أم أحمد.. سلسلة حكايا جميلة.. من طكطك لسلام عليكوووو [الصفحة الرئيسية]

همسة

07-30-2005, 05:59 PM

بسم الله الرحمن الرحيم

يا جماعة انا ستكو ام احمد

عمري سبعين سنة

بدي احكيلكو عن كل شي مركت فيه من طكطك لسلام عليكو

هادا يما كنت انا لسة زغيرة لما اجا عمي ابو ابراهيم الله يبشبش الطوبة الي تحت راسو

وكال لابويا

خد هالعشر ليرات وهالحلك وبنجوز ابنك حسن لبنتي صفية

كالو ابويا يا زلمة البنت لسة ما طبكت الخمستعش

ردعليه عمي له يا زلمة كل البنات بيتجوز بهالسن بعدين هي اصلن هيك صارت كبيرة

نادى علي ابويا وكالي

ولي يا صفية.. اجيت وانا بعمل بظفايري

ايوة يابا

كالي جهزي حالتش بدتش تتجوزي الاسبوع الجاي على ابن عمتش

انا انكسفت بس فرحت

عالاكل راح يجيبو الي كندرة كعب عالي من الي نفسي فيها

ابن عمي هادا يا جماعة الخير والله ما بعرف كيف شكلو

بس بظن ها بظن مرة لمحتو في الحصيدة كان طويل واسمر كتير

وعندو شنب يكف عليه الصكر

مش زي بنات هالايام

تبكى عارفة كل اشي فيه

حتى مكاس رجلو

والله المهم...

ولا اقولكو

خلوها للمرة الجاية بكمل الحدوتة يلا خاطركو

almajd

07-30-2005, 08:39 PM

همسه اذا ستنا ام احمد عمرها 70 سنه هذا يعني اننا سنتعرف على سيرتها كامله.سيرة ستنا ام احمد سيرة افتراضيه لكنها تجربة حياه.نحن بالانتظار لنتعرف على هذه السيره

طبيبه مسلمه

07-31-2005, 03:30 AM

حلووو كتير يا همسه 1011 وهينا كاعدين ابنستى فى الحلكه الكادمه44445

من كصة ام احمد كصدى ستى الحجه ام احمد

بس بدنا الكصه بالتفصيل 0036

بسمة أمل

07-31-2005, 11:05 AM

وينك يا ام احمد
تاخرتي علينا الله لا يوطرزلتش
اتتاخريش احنا كاعدين بنستناتش على نار
ولك شوكتينا لها الكصة
وبعدين شو اخباره ابو احمد عايش ولا صارت عظامه مكاحل
اذا مات كوليلي وانا اجوزك سيده
بس يمكن مات هو التاني
يا الله سلام ههههههههههههههههههههه

ابو حمدان

07-31-2005, 01:32 PM

بسم الله الرحمن الرحيم

الاخت الفاضلة همسة

روائع ادبية ....... من الشواكيش الى الحكايا .. .. حكايا شعبية من وطني الغالي

مبدعة يا همسة

بارك الله فيك و في قلمك الذي يخط لنا هذه الروائع

بانتظار المزيد

مع احترامي

ابو حمدان

همسة

07-31-2005, 01:41 PM

بسم الله الرحمن الرحيم

المجد

راح تضحكو كتير وراح تبكو كتير على حكايا ام احمد، ام احمد هي صح شخصية من خيالي

لكن راح تلاقوها في كل بيت فلسطيني.. وفي كل قرية فلسطينية، ام احمد هي رمز للقضية وللتراث

للتغيرات الاجتماعية والسياسية والعادات والتقاليد يلي بنمر فيها.. اتمنى انها تسعدكم وتستمتعوا مها

طبيبة مسلمة

بالفعل طريقتك بالحكي متل ام احمد خلتني اضحك من اعماق اعماقي.. يسعدلي يا رب هالظحكة

كلبت عكلي وكلبي ( قلبي بس خلي بالك بلكنة ام احمد ) يسعدتش ربنا على هالصبح ما احلاه

amal

بدك تزوجي ام احمد سيد سيد ابو احمد والله هادا بيطلع على عمر ابو الهول بهالحسبة

الله يسعدك ويبسطك يا رب

أبو حمدان

ما يسعدني حقا هو تواجدك في صفحتي المتواضعة.. واتمنى الا اكون مقصرة بأي شيء

فلكل حق وانا احب ان احترم حقوق الآخرين.. اتمنى ان اكون بهذه المشاركات البسيطة

أن اعطي سيء من حقوقكم علي...

جميعا

احبكم في الله

أختكم

همسة

07-31-2005, 01:59 PM

بسم الله الرحمن الرحيم

ارجعت الكو يا اولادي يا حلوين

لوين وصلنا هلكيتي اه وصلنا لحد العرس

والله يا شباب ويا بنات يا مفاعيص اشترولي الكندرة الي كان نفسي فيها

وما كنت انام غير وهي جنبي

ها وشو بدي اسوي طول عمري اتفرج على كندرة امي واكول وكتيش تصير عندي كندرة زيها

تكولي امي لما تتجوزي بنشتري الك واحدة ضليت احلم فيها لما كربت اتجوز

وجاب الي ابن عمي ( العريس ) طنجرة ستلستيل وفلكة صابونة نابلسية اما ريحتها بتجنن

والله لبسوني هالثوب.. وعملولي شعري ظفاير واول مرة ارفع عن راسي الخلكات

وكحلوني

يما ما احلى عيوني بالكحلة بتعرفونيش وانا متكحلة واحدة تانية

وجابو عروسة خد الوردة بتعرفوها هادي الي بيكون لون الوركة احمر

وحطولي على خدودي

والمعلمة الي كانت بالمدرسة تبعت الكرية الي جنبنا كان معها كلم هيك صغير

بيطلع لون حلو حطولي منو

واجا اخدني ابن عمي على الهودج

والناس فرحانة

وانا اطلع بالكندرة واكول ما احلاها ما احلاها يا رب كل الصبايا تتجوز عشان يلبسن كنادر زيها

وبنات الحارة الي كانن يلعبن معي بالحجلة كالولي احلى كندرة شفناها بالكرية

امي مسكتني وكرت علي سورة الناس خوف العين.. اه ما هو انا اول مرة بتكحل!!!

وصارو رجال العيلة يغنو يا زريف الطول وغنو وين عارام الله.. بس ما بعرف انا وين هادي رام الله

كريبة من كريتنا سالت امي.. كالت لي اسكتي العروسة بتضل ساكتة يوم العرس وبتحط راسها بالارض

راسي كانت مغطاية كلها ومش شايفة حاجة ولا شايفة عريس ولا شايفة ناس.. كنت مركزة كل تفكيري على ايش؟؟

صح!!

عالكندرة

انا كنت مركزة عليها مش بس عشان هي عجباني لا لا ظلمتوني عشان انا لازم اكون خجلانة ولازم اطلع بالارض

ما يحكو عني مدردحة وبتطلع بعين كوية بالناس.. ما كان كدامي غير الكندرة اطلع فيها عالارض

والبنات يغنن ويركصن عالكراصية... وشدو الهودج يلا.. مشتاك لحبيبي والله وهالاغاني والزغاريت

مش زي بنت هالايام.. يوم عرسها بتكون كايمة العرس لحالها وهاتك يا ركص كانها اول مرة بتركص

ولا ايش كلو ولا ركصة شو اسمها ( السل السل ايوة السلو ) كال هادي الي بتحضنو وبيحضنو يخسو من هيك ركصة

والله ما عرفنا طعم المياعة غير على عهدكن يا بنات اليوم

ولا ايش يختي كال لازم يلبسها الذهب والالماز كدام الناس..وليش الفشخرة بالله؟؟ يمكن العريس ما معو يجيب هالكد ليش احنا نحطو بموكف مش نافع احنا تغيرت نفوسنا ليش الفرحة يا ناس بالقلب ( كتبتها بالقاف عشان ما حدا يفكرني بحكي عن الكلب ) الفرحة يا ناس لما نشوف اهلنا وصحابنا وحبايبنا مبسوطين وفرحانين...

اجى ابويا وسحبني من ايدي الله يرحمك يابا.. واخدني وسلمني لابن عمي وكالو.. دير بالك عليها

وسمعت صوت الراجل ابو شنبات يلي بيوكف عليها الصكر بيكول ( لا تخاف يا عمي بحطها بعيوني )

ايش يعني بدو يعملني كطرة عيون ويحطني بعيونو؟؟ ما فهمت ايش الي بيحكو بس يلا

واخدني ابويا على جنب لاخر مرة وكالي...

اسمعي كلام جوزك في كل اشي واياكي تعصيه ولو رجعتي الي حردانة.. راح ادبحك...

انا لما سمعت هالكلام.... يلا بكول الكم المرة الجاية ايش صار فيّ سلامة تسلمكم

طبيبه مسلمه

07-31-2005, 03:51 PM

ما شاءالله عليكى يا همسه شو هالعرس الحلو لستى ام أحمد0036

يا ريت لو كان فى فيديو كنا نشوفه 1011 بس أحلى اشى فرحتة ستى ام احمد بالكندره

لو بدنا نستنى العريس زى ستى الحجه ام احمد عشان يلبسنا كندره كان ظلينا حافيين

ما أحلاها ستى ام أحمد وهيا خجلانه 1007مش زى بنات اليوم والاحلى انه بالها مشغول بالكندره

ما أحلى ايام زمان وأيام ستى أم أحمد الهااااااا طعم غير شكل طعم البساطه والفرحه اللى من الكلب

كصدى القلب 1004

وهينااا كمان كاعدين ابنستنى الحلكه الكادمه بس يا ريت اتطوليها اشوى1014

تسلمىىى يا همسه

سعيد

07-31-2005, 04:54 PM

الله يسعد دينكي ما احلا حكياتج يا ستي

على كد ما ضحكتينا على كد ما بكيتينا

من ويلج هاظ الحجي جلووووووووو

هوا انت كنتي تشوفي التغريبه الفلسطينيه ؟؟

لكن حكياتك احلا شوي يا ستي

جايبانا حجياتهم وجاي هون فرحانه على حالج

الله على زمان وايام زمان وهداة البال

اه شو صار لما سمعني ابوجي بيحجي الج هيج يا ستي

اكيد كلتي

يا ويلي

اي و الله لو ابو الشنبات الي بيوكف عليها الصكر بيدويذبحني منا جاي الك يابا

اي هو انا ما صدكت وفرحت على حالي وهيني لابسه الجندره الي جنت بحلم بيها طول عمري

و بدك ارجع زعلانه

طيب يا ستي اكيد ما عرفتش احرق الحلقه ما بيطلع بايدي اصلان هههههههههه

بس بعد شوي حعرف وحتعلم منج

مشكوره الاخت همسه فعلان اسعتيني بمواضيعك

وردور الاخوه و الاخوات كلها اللهم لا حسد خفيفة الظل

بتضحك

دائما ان شاء الله اسره واحده مميزه يارب

تحياتي للجميع

و هديتي

بدي احكي قصه يا اخوان نشيد رائع

يارب لو ما اشتغل عندكم نزلوه و بيشتغل ان شاء الله

http://www.qudsway.net:88/Links/SoundAndVedio/Sounds/Islamic/20.zip

للتحميل من هنا (http://www.qudsway.net:88/Links/SoundAndVedio/Sounds/Islamic/20.zip)

سعيد

07-31-2005, 04:56 PM

و الله ما بعرف شو قصة المنتد ى صاير

بيخربط

النشيد مرة اخرى ويارب يزبط

بدي احكي قصه يا اخوان

وحملتووووووووووووو مرة اخرة ويارب يزبط

http://www.pal-almuslimah.net/vb/up_ar/up/asdfghjkl;.rm

حمل من هنا على بركة الله (http://www.pal-almuslimah.net/vb/up_ar/up/asdfghjkl;.rm)

همسة

08-01-2005, 02:02 PM

بسم الله الرحمن الرحيم

اختي طبيبة مسلمة

الله يفرحك ويسعدك كمان وكمان وحكياتتش يفرحن الكلب ( القلب ) والله شوفتتش بهالصفحة تنور الدنيا وتملي الريحان بكل الكرية.. ربنا يخليكي ولسة الحكايا ما خلصت.. ما بين دمعة وابتسامة راح تلاكو ام احمد في كل مكان.. خليكي معنا على الانتظار..

اخي سعيد

يا هلابتش.. لو تعرف كديش بتكون ام احمد فرحانة وانتو بتكرو كصتها.. بتكيف عليتشم تكييف الله يلي بيعلم فيها ولا تكييف الفا خخخخخخخخخخ كصدها تكييف انبساط مش تكييف للهوا البارد.. يكصف عمرها ام احمد ما اكواها.. غصب عنا بتخلينا نظحك..

هاظي هي المفاجأة يلي كنت حاكيالتش عنها.. عجبتتش؟؟

ان شاءالله هناك عودة لحكايا ام احمد

انتظروها

كل محبتي

اختكم

همسة

08-01-2005, 02:04 PM

بسم الله الرحمن الرحيم

كيفكو والله اشتكت الكو وتعودت الاكيكو كل يوم، يلا على خير ان شاء الله

اخيراً انا اتجوزت، ولبست الكندرة الي بحبها وتهنيت بقربها

لما ابويا حكالي هديك الليلة راح يدبحني كلت بعكلي وشو يحردني انا رايحة ومعي كندرة يعني مبسوطة عالاخر

بعد هيك مسكتني امي.. وحكت الي ايش بدو يصير من لما نخش بالاوضة لحد منطلع منها

والله يا جماعة الخير نشف دمي.. كلام بينحكاش.. طيب والعمل.. كلت يا بنت خلي الي يصير يصير

خشيت الاوضة انا وابو شنب بيوكف عليه الصكر، كانت اول مرة اطلع بوجهو

اطلعت وانا مستحية، هو ما استحى اجى وكرب عليّ

وكالي كلمة حلوة كتير، بحياتي ما راح انساها

كالي كومي ولي هاتي ناكل، وانا انبسطت بيكولي هاتي الي اكل

جبت الو صينية كانت مليانة لحمة بعد وكت طويل كان كاضي عليها ومش مخلي اشي

جبت الو المنشفة وغسلت الو ايديه وجبت فلكة الصابون النابلسية متزكرينها اكيد

كام وشلح الكمباز تبعو، يؤ كتير كمبازو كان جديد سألتوني كيف عرفت مهو انا اختو منو وعلكتو على النملية

المهم بعد كل هالكصص.. طلع برة.. والا امو بتفكع الزغروتة كوية حماتي هادي..

اجت عندي وانا خجلانة.. كال ايش بدها اياني خلال شهر اكون حبلة

وهددتني لو ما كنت حبلة خلال الشهر الجاي.. راح تجوز ابنها على طول.. اصلو مرت عمي طول عمرها ما بتحب امي

ونفسها تجيب الي ضرة الله يضرها ..

طكطكت حماتي الباب كبل الفجر بدها اياني اكوم اعجن... اولاد عمي 15 وابو شنب بيوكف عليه الصكر هو البكر.. يعني من ايدي لايد مرت عمي بالعجين.. جابت الي هاللجن.. وصرت انخل العجينات واعجن أي و الله انهد حيلي من اول يوم يوكصف عمرها ما اكواها.. ايدي كانوا لسة صغار بس خلتني اعجن 120 رغيف.

مش زي بنات اليوم.. بيصحو من النوم الساعة 10 وجوازهن رايحين عالشغل بيقولن الهم هاتو معكم خبز اما دلع ومياعة ما الها لزوم صحيح!!!

كطعتهم وحميت هالفرن وبديت اخبز، ما ادن الصبح الا انا مخلصة كل الخبز.. كان الفجر مأدن.. سخنت هالميات وصحيت ابو شنب يوكف عليه الصكر اتغسل وراح عالجامع.. وانا مهدود حيلي... كنست الحوش.. ونضفت البايكة وطعميت الارانب وحطيت البرسيم للغنمات.. كل هادا وانا بالصباحية والله ما انا عارفة بعد سنتين ايش بدي اعمل.. بس تزكرت كلمة ابوي لو رجعتي حردانة بدبحك.. حردانة؟؟ شو الي يوديني حردانة..

مش زيكن يا مدلعات.. من تاني يوم بتحردن.. وبتعملن كصص لاهليكن بدكن تستحملن ايش يعني تسون؟؟

كل هالشغل وانا لسة يا ناس عروسة.. كالتلي حماتي عرسة تاكلك.. مستخسرة فيّ اكون عروسة.. يكطعها كطع

رجعو من الجامع كنا مجهزين الفطور..راح ابو شنب يوكف عليه الصكر وباس على ايد امو وراسها وكالت الو الله يرضى عليك والله يما حيلي انهد.. من الفجر وانا بعجن وبخبز عشان تاكل يما خبز سخن لما ترجع من الصلاة.. اطلعت في حماتي.. كمان كزابة يا عيب الشوم عليها.. مرة كبيرة وكزابة.. سكتت.. بس هو اطلع فيّ يما ايش بخوف يما ايش بخوف؟؟ كالي وانتي وين كنتي؟؟ كالت الو حماتي كبل لاجاوب كانت نايمة يما معلش هي لسة عروسة وخليها تفرح بحالها.. لسة ما نطكت كان كايلي الي من اليوم وطالع بتصحي بتعجني وبتخبزي وامي بترتاح..

بيصدك امو في كل اشي بتحكي.. مش زيكم يا شباب اليوم.. نسوانكن بيعملن السبعة وزمتها وبتيجوا على امياتكم وبتظلموهم ؟؟

كلت له ان شاء الله حاضر.. وسكتت..

كالي يلا بدي اروح اشد عالكارة والحمار وجهزي حالك تروحي معي بدنا نروح اليوم نزرع بتنجان..

اطلعت في وفي حماتي عشر مرات وكلت في بالي مش حرام عليهم اليوم صباحيتي.. المفروض يعزوني شوية.. اي هو كل هدا معزة والله ما بدي اياها.. كلت له حاضر.. لبست هالثوب وحطيت هالخلكات على راسي.. وركبت جمبو على الكارة وصار يكول للحمار حا حا.. وبعدها... يلا بحكي الكو المرة الجاي

طبيبه مسلمه

08-01-2005, 03:43 PM

كيفك اختى همسه يعطيكى العافيه44445 على كصة ستى ام أحمد

على كد ما انا مبسوطه وانا بكرا ( بقرأ ) كصة ام احمد على كد ما ازعلت عليهاا1006

حرام عروس واو ل يوم تعجن وتنظف وتفلح 1030 الله ايعينهاا على حماتهاا ام ابو شنبات بيكف عليهن

الصكر والله كلبى (قلبى ) معك يا ام احمد 0ما شا ءالله عليها ستى ام احمد مطيعه وشاطره

فلكة الصابونه النابلسيه طبعا متزكرينها ما اببنساهاا لسه موجوده وبنستعملها زى ستنا الحجه

تسلمى همسه على هالحلكه الحلوه من كصة ام احمد0036

هيناااااا ابنستنى الحلكه الكادمه بس ما اتطولى علينااااااا

همسة

08-01-2005, 09:10 PM

بسم الله الرحمن الرحيم

اختي طبيبة مسلمة

تسعدني حكايا ام احمد ويسعدني تواجدك الرائع دائما بصحبتها...

هل تصدقيني لو قلت لك كم تمنيت ان اكون انا ام احمد؟؟ وانت؟؟

تستغربين؟؟؟ لا نريد الحضارة ولا نريد المدنية.. فلم تجلب لنا سوى مزيدا من الهموم

ومزيدا من المصائب والمشاكل التي لا تعد ولا تحصى

فكانت الحياة ببساطتها،،، رائعة روعة النقاء في الطبيعة

كل محبتي لتواجدك ولقلمك ولروحك الحائمة حولنا كعصفور رقيق يغني ويشدو باعذب الالحان

بانتظارك دوما هنا

اختك

أمجاد

08-01-2005, 10:39 PM

هلا اختي همسة حياكي الله1036

والله نحتاج لمترجم يا همستنا

والى المزيد من حكايات الحجة ام احمد

طبيبه مسلمه

08-02-2005, 12:16 AM

تسلمى همسه والله انى مبسوطه44445 بكصة ام احمد بلسانك الحلو وكلماتك البسيطه

اللى بتودينا لايام زمان يييييييييى ما أحلاهاا أيام زمان وما احسنهاا بخبزتها اليابسه

وبهواها النقى ونفس اهلها الطيبين والله انا زيك كنت بتمنى انى لو كنت فى هداك الزمان

وزى ستى ام احمد

صحيح كانت حياتهم صعبه شوى وكاسيه بس كان طعمها حلوو وزاكى 1013

كل اشى كا ن احلى والناس اطيب وابسط مش زى اليوم والاهم كمان زوجها لام احمد

اللى بيوكفوا على شنباته الصكر بعض زلمات اليوم او شباب اليوم لا شنب ولا صكر مع احترامى

لاخواننا فى المنتدى 1007

هياتناااااا كمان ابنستنى فى همسه0036 اتكمل النااا كصة ام احمد

همسة

08-02-2005, 05:14 PM

بسم الله الرحمن الرحيم

اختي طبيبة مسلمة

ام احمد.. هي عبق الماضي.. وعبق التراث... هي جزء مني ومنك..

بنتنا قبل ان تختفي.. اصبحت ظاهرة غير عادية..

نراها فقط في المناسبات التي نحييها او في الحفلات العامة

امرأة ترتدي الثوب الفلاحي المطرز..

وتبحث في كل ناحية عن شيء تقصه لك عن حكايا القرية التي تركتها

اصبحت الثياب المطرزة ترمز لإسرائيل في جميع انحاء العالم

فهل حافظت اسرائيل على تراثنا؟؟ لتسرقه؟؟

نعم هي سرقت التراث.. كما سرقت التراب

رسالة من ام احمد لك

يكصف عمرك ما ازكى حكياتتش

أمجاد

يسعدني تواجدك وتبهجني اكثر عودتك.. فهل لك من عودة؟؟

قلمك ضياء في صفحتي.. فدع الضياء يكمل نوره حتى النهاية

كل محبتي

اختك

marwa

08-02-2005, 07:15 PM

ربنا يوفقكم اللهجه صعبه لكنها مهضومه

إيمان

08-02-2005, 08:47 PM

ههههههههههههههههه اضحك الله سنكم
الله يسعدك اختي همسة واختي امل ويسعدك ستي ام احمد هههههههههههههههههههه

همسة

08-03-2005, 12:52 AM

بسم الله الرحمن الرحيم

أختي إيمان

هذه اللهجة هي لهجة جدتي وجدتك.. والله جميلة جدا،،، ولزيزة انا احبها جدا رغم اني لا استوعب كل مفرداتها

وان كنت سعدتي بتواجدك هنا فنحن اكثر سعادة بامضاء اسمك داخلها...

marwa

لهجة جميلة ليتنا نعيش فيها لو اسبوع فقط كحفاظ على التراث

لكما

كل محبتي

اختكما

همسة

08-03-2005, 01:04 AM

بسم الله الرحمن الرحيم

طلعت انا والزلمة الي بيوكف على شنبو الصكر في يوم الصباحية على الارض تبعتو

وكال مرت عمي يلي هي حماتي بدها تضل بالدار عشان تستكبل الناس الي بدها تبارك

بس حدا يفهمني انا لمين بدهم يباركو اذا انت كنت طالعة عالارض معو

المهم عزكنا الارض هو بالفاس وانا بحط بعدو الفول والحمص والعدس

هو بيعمل جورة باصابعو كبيرة اصابعو هي وانا بحط الحب بعدو وبسكرها

لما اذن الضهر كعدنا شوية تحت التينة.. وحطيت الو السرحة تبعتنا واكلنا مع سوا

ما كان بيحكي كتير

بس لما كان بيطلع فيّ .. كنت احسو بيحكي كل الكلام الحلو الي بالدنيا

ويبتسم الي ابتسامة صغيرة من طرف تمو

اشوف الكمر فيها

يكولي يلا يا بنت خلص بكفي عاد يلا نرجع نكمل الزراعة

نرجع تاني عالارض..

كان كل شي اهون على كلبي من رجوعنا للدار.. هادي المرة الي اسمها حماتي

راح تسم بدني على اكل اشي.. خليني معو هنا بين هالشجر وهالمي وهالزراعة

وصوت العصافير بتزاكي بكل مكان..

بعد العصر

ركبنا مرة تانية عالكارة والحمار تبعنا.. وانا كعدت جنبو..

وانا حاسة كل الناس تطلع فيّ... مش مهم انه انا عروس طالعة يوم صباحيتها

بس حاسة كل البنات تبصبص علينا من خرك الباب.. وبيكولوا بعكلهن والله ربحتي يا صفية

اخدتي احلى شب بالكرية كلها..

بدي ابخرو لما ارجع.. بلاش وحدة تصني عين.. تخرب بيتنا كبل نبنيه

رجعنا للدار

نزلت البكس والفاسات عن الكارة

وهو ربط الحمار ( الله يعزكم ) وفكفكنا..

لكيت امي وابوي بالدار.. امي مسكتني وعبطتني وكالت الي الف مبروك يما

عكبال لاشوف اولادك عرايس

ابويا حط بايدي عشر ليرات وكالي الله يبارك لك يابا

كعدت شوية معهم

وسالتني امي اكمن سؤال عن الي صار امبارح..

وفرحت كتير لما كلت الها عن الي صار.. وقالت لي الله يخليكي يما

بيضتي وجهنا..

ليش بيضت وجههم لهلكيت نفسي اعرف..

المهم بعد هيك كان الناس يجو يباركو وايش يجيبو تسحبو حماتي على اوضتها

والله ما بعرف كلبها عامل متل البير.. اي شي بترمي بيعبي

ما نامت حماتي الله لا يبارك الها غير لما خلتني اجلي كل الجليات بعد الناس مروحت

هدت حيلي الله يهدها من اول يوم..

والجلي مش زي هالايام بالـ فيري او بالجلايات.. خلتني اجلي بكبشة رمل وليفة

صارن ايدي سود سود بدهن حجر جلخ ليروح منهن السكن والهباب

بعد العشا بستين عشا.. بدا السامر في الكرية

صار الشباب يدبكن.. والنسوان يسحجن. ويغنن الدلعونة

وانا فرحانة كتير بعد هاليوم الشاك في الحكل

لبست ليلتها ثوب والله لسة متزكريتو.. لونه ازرك غامك

وخيوطو مطرزة بالاحمر والاصفر

كانت الالوان بتاخد العكل

وحماتي كانت فرحانة كتير.. وبتكول للناس شايفين ما احلى كنتي؟؟

يكصف عمرها.. كبل شويتين كانت تتطلع فيّ بلؤم..

المهم خلوني ليلتها اركص وانا مستحية على اغنية الكراصية

ركصت ونكطوتي الصبايا كل واحدة حاجة غير شكل

وفرحت كانن صحباتي كتير يحبني

جابولي حاجات كتير وهدايا كتير

اجى عمي ناداني كدام الكل

وسلمت عليه وبوست على ايده

كالي ( الله يرضى عليكي يا بنتي )

واعطاني عكد فيه الليرات الذهب يلمعن لمع بضو الكاز

كل صحباتي حسدني عليه

روحت الصبايا

وخلص السامر

رحت انا وجوزي ابو شنب بيوكف عليه الصكر.. على اوضتنا

الا وحماتي الله يحمها بتنادي علي

كالت الي هاتيه هدا بس هيك منظرة كدام الناس.. ولا تكولي لعملك او لجوزك

الله يكصف عمرها

اخدتو وما فرحتني عليه

صرت ابكي وابكي وابكي

رحت لجوزي

اتكحلت عشان ما يشوفني وانا ببكي

راح كالي...

يلا بكول المرة الجاية شو صار سلامة تسلمكم

طبيبه مسلمه

08-03-2005, 02:33 AM

ما أحلاها ام احمد شو رومانسيه 1007 على الأكل هيا لحالها مع ابو شنب يكف عليه الصكر

بتخيلهاا وهياا كاعده معه فى الحكل وتحت الشجره وهواا بلادناا الحلوو وكيف انه نظره حلوه بس من

زلمتهااا بتكفيهااا44445

يا عينى عليهاا ام احمد وعلى برائتهااوبساطتهااا وطبيعتهااا الحلوه اللى ما بنشوفهاا هاى الايام

بس هاى حماتهااا نسره الله ايعيينها عليهااا مسكينه يا ستىى من وين طلعتلك هاى الحماه الغوله 1006

يا ساتر عليهاااا بتكوش على كل اشى لستى ام احمد ما خلتهاا تتهنى بشىء

ان شاءالله ابو شنبات بيوكف عليهن الصكر يجبر خاطرهااا44445

الله يسعدك يا همسه ويسعد حكياتك وكصتك اللى بتبرد الكلب ( القلب) فى هالجو اللى مولع عناا من الحر0036

همسة

08-03-2005, 03:54 PM

بسم الله الرحمن الرحيم

أختي طبيبة مسلمة

ما يسعدني أكثر شيء هو تواجدك الدائم ومتابعتك لحكايا ام احمد وا ستمتاعك بها

وازعجني جدا عدم تواصل الآخرين...

ام احمد ليست سوى نبذة عن الماضي الجميل والبريء

الروعة.. البراءة.. البساطة

كلها في ام احمد

ليتنا كنا هناك وفي ذلك الزمن

كل محبتي لتواجدك الرائع

أختك

أبوصلاح

08-03-2005, 08:38 PM

ربنا يكون بعونك أختي همسة
وربنا يسعدك مع أبو شنبات

سلام عليكم ورحمة الله وبركاته

همسة

08-03-2005, 11:10 PM

بسم الله الرحمن الرحيم

أخي أبو صلاح

اشكرك لمرورك على حكايا ام احمد

وابق معنا فما هو آتٍ مختلف تماما لما مضى

جميعا

انتظرو المزيد من حكايا ام احمد

كل محبتي

أختكم

طبيبه مسلمه

08-04-2005, 12:13 PM

أختى همسه 44445كيفك ان شاءالله بخير

وين الحلكه 1007 طولتى عليناااااااااااا

هيناا ابنستنى مع كاسة الشاى وفنجان الكهوه1011

بس ما تطولىىى علينااااااااااا0036

همسة

08-04-2005, 05:37 PM

بسم الله الرحمن الرحيم

ينطيكو العافية

خلوني اكمل الكم شو صار بهديك الليلة

لما لكاني باكية وزعلانة.. كالي تعالي

رحت لجنبو.. كالي يسعد الله هالخلكة ما احلاها

انا خجلت.. مش زي بنات هالأيام.. لما يكول الها كلمة زي هيك

بتفط فط زي الاولاد الصغار وبتتركوص

كالي اسمعي اكولك شغلة.. انا عارف ليش انتي زعلانة.. سالتو ليش؟؟

كالي عشان العكد الي جابو ابويا.. نزلت عيني عالارض..

كالي يبكي مزبوط عشان العكد.. لا تزعلي انا بجيب لك احسن منو

بس لا تكشري هيك بالمرة.. انا لسة بدي احكي.. كالي وما بحب المرة الي بتحكي كتير..

سكتت.. ايش بدي اسوي معها هادي حماتي الكوية..

والله يا جماعة الخير وكأنه ربنا عارف شو بدو يصير معي لو ما حبلت في هداك الشهر

كانت حماتي تنك فيّ عالطلعة وعالنزلة.. وخلصي خلفي بدي افرح بابن ابني.. خلصي خلفي..

لما طلعت الي ابن ابنها في وذاني.. بتنك كتير هي نكاكة..يكصف عمرها..

وفكعت الزغروتة لما ام اسماعيل الداية كالت اني حبلة... واعطتها عمتي ليرة بحالها..

وعمي فرح كتير.. وكالي خلص انتي ما الك طلعة عالحكلة بعد اليوم.. كلت له لا يا عمي انا بدي اروح

بحب انا اروح عالحكلة مع جوزي.. خلال هديك الفترة انا بدكو الصحيح كتير كنت مبسوطة مع ابو شنب يوكف عليه الصكر

كان هو كتير عاكل.. ومش تبع مشاكل.. وكان لما يطلع علينا حية او عكرب.. ما يسكت ولا يهدالو بال غير يكتلو ايش بدي اكول ولا اكول.. كان راجل بمعنى كلمة راجل..

وكنت اساعدو بالحكلة على كد مكدرتي،،، وبعد تسع شهور.. نادت حماتي.. ام ابراهيم الداية كمان مرة.. وكالت اني راح اولد.. جابوا الي كرفة عشان تساعدني في الطلك.. وكتير حكيت حكي الو لزوم وما الو لزوم.. بس كتير صرخت.. وحماتي تكولي الله يكميك بالسلامة.. ليش بدها اياني اكوم بالسلامة؟؟ يمكن عشان ابن ابنها الي بتحبو!!! وعمي كتير فرح بإنو الله راح يعطيني ولد..

وعلى طول سمو الولد على اسم رسول الله ثم على اسم سيدو ( احمد ) ومن يومها كل الناس بتعرفني باسم ام احمد..
كالي ربي يخليكي الي يا فرحتي.. يا صفية.. يا ربي شو فرحت... كنت احب كلامو بس عشان ما بيحكي كتير..

ولما اجا احمد عمي حملو بين ايديه وفرح كتير عليه وانبسط وكالي ( ديري بالك عليه يا صفية )، كلت له بعيوني يا عمي...

بعد اكمن يوم.. مرض عمي كتير.. اخدو جوزي على الاسبتالية بالمدينة.. وهناك كرروا انه العلاج بدو يطول وانهم بدهم مصاري..ومصاري كتير كمان.. عمتي كالت بيعو كطعة ارض..

وكف ابو شنب يوكف عليه الصكر وكال بصوت عالي لاااااااااااااااااااااا... طلعت انا كمشة الليرات الذهب الي عندي..

وهو طلع شوية مصاري كان محوشهم.. وطلب من امو تعطيه اللي معها.. امو بكت كتير.. وكالت غاليين هالذهبات عليها

وراح على صحابو.. وجاب بكية الفلوس.. وكال ان شاء الله بنسدهم.. ولما اخد ذهباتي كالي.. والله ما ما بكزب عليكم يا جماعة كالي ومتزكرة كلامو حرف حرف ( الارض اغلى اشي بهالدنيا.. لو خسرناها خسرنا كرامتنا.. بس الذهب ان شاء الله معوض.. وطول معنا ارض بنجب احسن منو، لانه الذهب اساسا بيطلع من الارض..)

كديش فرحت على كلامو.. وكررت اني اعلم كل هالكلام لابنو احمد.. بدي ابني احمد يطلع زي ابوه.. هيك رجال.. الواحد بيعتمد عليه..

واخذ ابو شنب يوكف عليه الصكر.. المصاري.. ووداهم لعمي عالاسبيتالييا.. بكرة بكمل الكم.. تصبحو على خير..

همسة

08-04-2005, 05:38 PM

بسم الله الرحمن الرحيم

صورة مهداة من ام احمد وابو احمد اليكم

http://ankawa.com/ikonboard/upload/elqosh_zay.jpg

كل محبتي

أختكم

أبوصلاح

08-04-2005, 06:24 PM

مبارك عليكِ أحمد يا أم أحمد
يتربى في عزك ان شاء الله
ولا تنسي تربيه على الاسلام
تربية اسلامية بحثه

سلام الله عليكم ورحمته وبركاته

همسة

08-04-2005, 08:00 PM

بسم الله الرحمن الرحيم

ابو صلاح

شكلك ارهابي انت والله بدك تعدمنا ابنا وهو لسة صغير

انت مش عارف انه الاسلام هالايام يعني ارهاب يا عمي ابعد عنا

بدي ابني يطلع مغنوج انا ولا يطلع ارهابي

بمزح انا طبعا او بالاصح بتهزا من الناس يلي بتحكي انه الاسلام ارهاب

بارك الله فيك.. على فكرة كتير عاجبني التوقيع يلي انت عامله

متناسق مع الاسم وكأنه الاصلاح ما بيجي غير هيك..

بارك الله لتواجدك وحاول تتابع معنا.. بداية الجراح كانت الحلقة هاي

الحلقات القادمة ستحمل الالم والجرح الفلسطيني

اختي طبيبة مسلمة

اعذريني لتأخري في الرد عليكي.. لكن انا كتبت الحلقة قبل الرد

يمكن هيك يكون شي من المحبة والاحترام يلي بقلبي لشخصك الكريم

ولقلمك المتواجد دائما والرائع

تابعونا فالجرح لازال ينزف

كل محبتي

اختكم

طبيبه مسلمه

08-05-2005, 12:59 AM

تسلمى همسه 44445

ومبروك عليها أم أحمد ابنهااا أحمد0036

وهياتنااا بنتابع الحلكات معك يا همسه

ربنا يبارك فيك1014

salma

08-05-2005, 04:17 AM

ما احلى لهجتنا وكلامنا الفلسطيني قصصك حلوه يا اختي همسه يا ريت تستمري فيها

همسة

08-05-2005, 05:22 PM

بسم الله الرحمن الرحيم

طبيبة مسلمة

يسعد ربي مساكي.. وحياكي بكل التحايا الجميلة..

عندي عقد من الفل.. صنعتو بايدي من شجرة الفل يلي زارعينها بارضنا وترابنا

باهديكي اياه لحضورك المستمر ومتابعتك الدائمة

اختي salma

رائع ما كتبتيه رغم قلته تابعينا.. فالجرح الفلسطيني لم ينزف بعد!!

كل محبتي

أختكما

همسة

08-05-2005, 05:28 PM

بسم الله الرحمن الرحيم

ها كيفكم.. اجيت هيني... يلا افكعو الزغروتة.. ولا انا ما بستاهل؟؟

اخد هالمصريات ابو شنب يوكف عليه الصكر.. وطار متل الفريرة على الاسبتاليا بالمدينة

وعمل العملية لابوه.. الله يرجعو بالسلامة والله عمي زلمة طيب ما بيستحك هيك..

والحمد لله طلع من الاسبتاليا بعد مدة قصيرة.. ورجع السامر مرة تانية على كريتنا.. وهم يحتلفوا بعمي

كديش بحب كريتنا.. فيها شجرة توت كبيرة.. وفيها تين وفيها زيتونة.. ارضها فيها زلط متل الصخر..

والشجرة تطلع بين الصخرات.. تحسسك انها بتكهر الظروف الصعبة كهر..

بعد عملية عمي.. المصاري خربت عنا شوية.. صارت ظروفنا صعبة.. والديينة صح صابرين

بس جوزي ربي يفك زنكتو.. كان يخجل من لما يشوفهم بالجامع او بالحكلة.. كان يحاول يخفي وجهو بالكوفية

عشان ما يخجل منهم.. وما يطلع بعينهم.. كان بيعتبر الدين بينتكص من شخصيتو... شهم والله..

لغاية ما اجى مرة من المرات كال واحد اجنبي يتفرج على الزريعة.. كنت انا وابو شنب يوكف عليه الصكر بنتغدا بالحكلة

كال الغريب ( مرخبا ).. رد عليه ابو شنب بيوكف عليه الصكر ( اهلين ).. الغريب كال ( كديش بجيب هادا الارض فلوس؟ ) رد عليه ابو شنب يوكف عليه الصكر ( كد ميجيب انت جاي تطلع النا برزكتنا؟ ).. كام الغريب سألو ( بدي اخكي معك بموضوع ممكن على انفراد؟ ) رد عليه جوزي ( احكي ما في حدا غريب ).. كام الغريب عوج الغليون تبعو واطلع في من فوك لتحت انا كنت مغطية اصلا وجهي.. ما بكشف انا على رجال غرب.. بس انا خفت من وجهو.. كان حاطط طاكية مش زي طواكي المعلمين بالمدارس تبعت الكرية.. ومش كوفية زي كوفية ابو شنب يوكف عليه الصكر.. ومش عمة زي عمة الشيخ أبو خليل امام الجامع.. والله شكلو كان بيخوف..

المهم هدا هو الحكي الي دار بينهم...

- انا بعرف انه ظروفك كتير قاسية وصعبة.. انا عاوز اساعدك...
- تساعدني؟ كيف تساعدني يعني؟
- الارض بتسوى 5000 ليرة.. انا بعطيك فيها 6000 اكتر من كل اولاد البلد.
- وايش اعمل لما ابيعها.
- بتفتح دكانة، وبتجيب شمع وكباريت وكبشة بزر وبتبيعهم.
- والشجرات الي زرعتهم السنة الي فاتت.
- يا سيدي ببقى ابعت الك منهم حصتك تاكلها.
- أرضي الي انا بزرعها، وبكلعها.. وبحصد فيها طول النهار انا ومرتي.. واخدتها من اابوي ومن بعدي لاولادي، بدي اصير اكل منها هيك عزايم...
- انا مستعد اشتريها منك. واخليك تبقى فيها، تزرع وتحصد ولا كأنه في اشي قدام الناس عشان هيبتك بس.
- ما بدي اشي منك.
- والديون يلي عليك.
- ربك بيفرجعها يا زلمة انت جاي تنكد علينا.
- طيب بدفع الك 7000 ليرة.
- ولا 10000 ليرة.
- بجيب الك كمان فوقهم حلق دهب لمرتك.
- لو جبت كل كنوز الدنيا ما بفرط بشبر من ارضي.
- ايش بدي اقولك..انا بدكم الصحيح يا جماعة عصبت.. كلت علي وعلى اعدائي يا رب. وكفت وكلت اله روح يا شيطان. انت جاي بدك تخرب علينا. روح ربنا يخرب بيتك روح..

جوزي اطلع فيّ وكأنه بيكولي مش هيك النسوان بتعمل. خفت هلكيت يعمل الي كضية خصوصا اول مرة يرتفع صوتي كدامو.

لما بعد الغريب وهو بيسب وبيتوعد وبيتهدد.. اطلع في وكالي.. الله يحيي اصلك. بنت ارجال صحيح.

يا رب كديش فرحت من هالكلمة.. يسعدو الله كديش بيحسسني باني الي كيمة.

لما رجعنا عالدار.. كال ابو شنب يوكف عليه الصكر لعمي على كل الي صار من طكطك لسلام عليكو

العكربة مرت عمي.. صارت تصرخ علي، وانتي ايش دخلك يا مكصوفة العمر.. وانتي ايش الي حشرك بكلام الزلام.. لسة ما نطكت الي عمي بيكول بنت اصول يابا يا صفية بنت اصول.. راحت مرت عمي سكتت.

عمي كال النا انا وابو شنب يوكف عليه الصكر ( هدا يابا يهودي جاي يشتري اراضينا..)

كلبي دك دكة كوية وجوزي اتاخد وجهو ومع سوا كلنا ( يهودي؟؟؟؟؟)

بكمل الكو بكرة يلا سلام عليكو

طبيبه مسلمه

08-05-2005, 07:19 PM

مساك الله بالخير يا همسه44445

تسلمى والله على العكد ما احلاه هياتو فى ركبتى(رقبتى)1007

ما شاءالله عليها أم أحمد فعلا بنت رجال 1023

والله يوخدو هاليهودى وكل اليهود يا رب

ا للهم آمين1030

ربنااا يستر من الى جاى وهياتنااااا ابنستنى فى الحلكه0036

همسة

08-06-2005, 07:56 PM

بسم الله الرحمن الرحيم

اختي طبيبة مسلمة

لا ادري كيف اعبر لك عن سعادتي بتواجدك اليومي تقريبا في صفحتي المتواضعة

وفي حكايا ام احمد

انتظري فللحكايا بقية

كل محبتي

اختك

بسمة أمل

08-07-2005, 12:35 PM

لو لو لو لو لييييييييييييييييييييييييييييييييي

احلى زغروته لام احمد حبيبتنا

انا كمان بدي عقد زي عقد طبيبتنا

ولا ماا بستاهل يعني

الله يسعدك ويسعدها

وهينا بنستنا بقية القصة

همسة

08-07-2005, 03:01 PM

بسم الله الرحمن الرحيم

أختي amal

وجودك هو السعادة لي في صفحات ام احمد.. بداية الجرح الفلسطيني النازف

ولو كانت اختنا طبيبة قد حازت على عقد الفل الذي غزلته من شجرتنا

فلك مني عقد ستنالينه ويزدان عطره في عنقك.. فترابنا لا ينبت منه الا الجوري

وعبق الياسمين والنرجس والاقحوان...

كل محبتي لتركك بصماتك الرائعة هنا

اختك

همسة

08-07-2005, 03:10 PM

بسم الله الرحمن الرحيم

عمري يا جماعة ما شفت حدا بيضايك بالليل، زي مـ أبو شنب يوكف عليه الصكر ضايك هديك الليلة

حس الدنيا كلها بتدور فيه،،، يهودي!!! وايش بدو منا اليهودي؟؟

- يا زلمة روك بالك وخد كاسة هالشاي.
- يسلموا ايديكي
- مالك مضايك؟
- من اليهودي هادا؟ انا خايف؟
- انت بتكدر تغلبو وتبطحوا ليش تخاف منو؟
- انا مش خايف يضربني، انا خايف يسرك ارضي.
- هي الارض بتنسرك؟
- بتعرفيش انتي اليهود هدول بيطلعوا دايما للشغلة الي مش بايدهم وبياخدوها.
- لهالدرجة.
- واكتر من هيك.
- طيب بس انت روك بالك، وربك ان شاء الله راح يعدلها.
- يا رب يا صفية يا رب.

حط راسو وحاول ينام، انا ما نمت، بس حاولت افهمو اني نايمة عشان ما يشوفني كلكانة.

كام بنص الليل استغفر ربنا وصلى اكمن ركعة، وكرا القرآن. وبعدها نام. او يمكن اوهم حالو انه نايم.

تاني يوم صحيت انا من النوم مدعوكة.. حاسة الي مكسرة تكسير.. كالي خليكي بالدار، كلت له بدي اروح عالحكلة

ما بكدر اخليه يروح من غيري، تعودت انا على كل شي بالحكلة..

غصب عني والله راح.. ونزلت دمعتي لما طلع لحالو وهو هيك تعبان كتير..

مرت عمي ما كالت لي صباح الخير

- ليش مش رايحة عالحكلة؟

- حاسة حالي مريظة.

- شو مارظك بالله. امبارح لما وكفتي لليهودي ما كنتي مريظة.
لسة بدي احكي معها، كانت صاحبتها جارتنا جاية عنا.

- مال وشك مخطوف يا صفية.

- مش عارفة بس حاسة حالي مريظة.

- تعالي اشوف مالك.

الا وهي بتفكع الزغروتة، كالت لمرت عمي انا حبلة...

بوستني مرت عمي وكالت..

- مبروك يا صفية والله فرحتي كلبي.. ( كانت كاصديتها بالكاف )

- الله يبارك فيكي يا مرت عمي.. خلينا نبعت لابو شنب يوكف عليه الصكر نفرحو طلع حزين هو.

- لا خلي بس يرجع.

عملت شغل الدار بسرعة بسرعة بسرعة

ولبست الثوب الكحلي والكندرة كمان. وتكحلت ومشطت شعري..

واستنيتو تيرجع بفارغ الصبر..

ولما رجع. كانت ام كويك كاعدة عند الباب وبتكول اله انه هي فرحانة عشان انا حبلة، وما خلتني اعمل اشي بشغل الدار، الله يكصف عمرها والله ما رفعت كشة عن الارض...

والله طار من الفرحة ابو شنب يوكف عليه الصكر.. اجى عندي وكالي مبروك،، ان شاء الله يكون من الاولاد الصالحين..

وطلب من امي توزع كعك ومعمول على كل الاولاد الي بمدرسة الكرية..

وانا فرحت كتير.. هادي العكربة حماتي كانت بدها تجوزو علي لو انا ما حبلت من اول شهر..

بالليل..

كالي ابو شنب يوكف الصكر عليه.. بتعرفي يا صفية.. ربنا كبير انا امبارح نمت مهموم، من شوفة هاليهودي

اليوم فرحني ربي بهالطفل الي جاي.... الحمد لله رب العالمين الحمد لله رب العالمين..

انا كمان فرحت لفرحتو.. بس بتعرفو لما رجع زكر سيرة اليهودي اتضايكت.. ما بعرف ليش...

واحنا هيك.. دك الباب دكات كوية علينا.. يا عمي ابو إبراهيم يا عمي ابو إبراهيم.. الحك الحك..

يا إبراهيم.. الحك يا ابراهيم الحك يا ابراهيم!!!!!!!

طلعنا من الاوضة لنشوف شو في...

طبيبه مسلمه

08-07-2005, 09:17 PM

أهلا أختى همسه44445

الله يسعدك على كصتك هاى وكلامك الحلو

هاى حماة ستى أم أحمد العكربه ما راح اتجيبها لبر

يا ساتر عليهاااااااا بتكرص من تحت لتحت1006 وأم أحمد فعلا أصيله

واقفه جنب أبو شنبات بكف عليهن الصكر1007

وهينااااااااا بنتابع معك بكية الكصه وربنا يستر

ربنا يسعدك يا همسه0036

ابو حمدان

08-07-2005, 10:20 PM

بسم الله الرحمن الرحيم

اتابع باهتمام حكايا الجدة ام احمد ، اتخيل ان الجدة ام احمد هي جدتي و هي جداتنا كلنا، هذه الحكايا يمكن ان تنطبق على كل جداتنا، كم استشعر الماضي .. ماضي اجدادنا و آبائنا وأنا اقرأ هذه الحكايا ..

همسة

جميلة هي حكايا الجدة ام احمد لما تحمل من عبق الماضي و التي هي واقع ربما يكون مزيج من الالم و الحزن و من البهجة و السعادة.

همسة

" الله لا يعدمنا كلمك اللي بينقط شكاوة قصدي حكايا بتؤلمنا و بتسعدنا

يا ترى ايش عمل حفيد الكرود الله يقرده و يغضب عليه قولي امين .. الله يبلاه بصاروخ قسام

بس انا مش فاهم ليش مرة عمها للجدة ام احمد كاينة كاسيه معها .. و الله الجدة ام احمد ما بتستاهل غير كل الخير الله يعطينا رضاعا اذا هي بعدها عايشة و و يغفر الها اذا هي في الدار الاخرة "

همسة

تحياتي لك و الاحترام

ابو حمدان

همسة

08-08-2005, 12:05 PM

بسم الله الرحمن الرحيم

طبيبة مسلمة

هذه هي عادة الخبثاء اليهود... يمكرون.. وهذا ما حدث مع بعض من اهلينا

يجملون لهم وإن أبى بعضهم قاموا بـ ... سترين ماذا سيحدث، انتظري

فالجرح لازال ينزف...

وجودة شمعة اعتدت على وجود شعلتها فلا تحرميني نورها بعدم تواجدك

أبو حمدان

ملخصات رائعة وتعليقات جميلة.. بصمة رائعة ذهبية تركتها بتواجدك في ( حكلة أم أحمد )

أم أحمد هي شخصية وهمية من خيالاتي.. ولكن.. هي موجودة في قلوبنا جميعاً وأتحدى

كل ( حواء ) موجودة في المنتدى وفي خارجه تتمنى أن تكون ( أم أحمد ) التي نتحدث عنها

أم أحمد كما ذكرت سيدي العزيز قد تكون جدتي .. وقد تكون جدتك.. وفي المستقبل قد تكون أنا

او ابنتك...!!

إن كانت حماتها قاسية الطباع، فهي كعادة أغلب الحماوات، هذا ليس جديداً ولكن بعد حين

سترون معناً جميلاً للقساوة.. وسترون لماذا تعودها الخشونة.. ربما كانت تستشعر ما سيحدث من ألم

وتريدها أن تتحمل المسئولية بكل اعتزاز وصلابة.

ابو حمدان

دعني ارى اثار قسامياتك عفواً كلماتك دوما في صفحتي المتواضعة، فإن الكلمات منك ورود تزيد

جمال وعبق وسحر الماضي.

كل محبتي

أختكم

همسة

08-08-2005, 12:24 PM

بسم الله الرحمن الرحيم

ما اصعبها من لحظات.. كانت الدنيا صيف والدنيا كتير شوب،، وللي بيتفرجو علينا وبعرفوش ايش يعني شوب معناها الدنيا كانت حر..

طلع ابو شنب يوكف عليه الصكر يشوف شو صاير هو وابوه

بالطريك.. شاف الحكلة تبعتنا كلها مولعة

والناس بتحمل مي من البير وبتكب عليها، عمي انجن.. صار زي اللي راكبو جن بدو يخش في النار عشان يحمي الحكلة والزرع تبعنا..

يا خسارة التعب.. يا خسارة العرك الي عركنا هناك..

كل شجرة هناك شربت من تعبنا وا خذت من عمرنا واحنا بنزرعها وبنكلمها..

انكهرت انا من بعيد لبعيد.. اتعلكت بالزيتونات الصغار متل الام تتعلك باولادها.. كيف جوزي يلي مربية الشجرات معو.. من يوم ميلادو..

http://www.peacenowar.net/Palestine/Photos/jenin_fire.jpg

صار يبكي

ويطفي بالنار بثوبو مثل المجنون

وعمي يصرخ ( الله أكبر )

ويكول منه لله الي كان السبب.. منه لله

هي النار كان حدا مولعها.. لسة ما بنعرف اشي

ضلو اهل الكرية لحد الفجر وهم بيحكو بالكصة.. مين صاحب المصلحة انه يحرك حكلتنا

ما بيهمني انا مين حركها.. بيهمني هلكيت كيف بدنا نرجع نزرعها تاني ونعمرها واحنا معناش مصاري

عمي كان كتير تعبان ومهلوك.. وكان يبكي كتير.. الارض هادي عمرو تربى فيها

وعاش مع ابوه يزرعها ويكلعها

يا خسارة يا خسارة ربنا يجازي الي كان السبب ربنا يحرك كلبه زي محرك كلوبنا عليها

بالليل عمي مرض كثير.. وتعب كتير.. وكبل ليصل عالاسبتاليا.. كان مسلم الروح لخالكو

والله انكهرت. يعني موت وخربان ديار.. ربنا يصبر هالزلمة المسكين

عمي كان راجل طيب.. عمرو ما زعلني بحياتو.. كان يعاملني متل بنتو... الله يصبر مرت عمي

صار الها عايشة معو سنين وسنين.. ما كدرت تتحمل المسكينة الخبر.. ظلت تبكي عليه طول عمرها

كان هو وابنو صح كلال بالكرية عددهم بس كان الكل يحسب الهم الف حساب..

ابن عمي.. كان يكرأ القرآن ولما تيجي سور فيها عن الأب أو الأم يصير يبكي مثل الصغار

ويكولي بدموعه ( ابويا مات يا صفية ابويا مات )!!!

اكول اله ( البركة فيك )

يكولي ( أبويا راح وانكتل وانخطف من بين ايدينا خطف )..

بعد ايام العزا كعدنا بدون ارض وبدون رجال كبير يمسك كلمتنا بالدار..

وانا مش عارفة احكي معه ولا كلمة..

مرت عمي ذبلت عيونها وجفت على وجهها دموعها.. الله يصبرها والله مصيبة بتكسر الظهر

انا كنت صغيرة بالعمر.. لكن حاسة بكل المشاكل الي بيمرك فيها هالغلبان

بعد ايام العزا.. دك الباب... فتحت الباب..

طبيبه مسلمه

08-08-2005, 03:17 PM

لا حول ولا قوة الا بالله

انا لله وانا اليه راجعون1004

حسبى الله ونعم الوكيل كلو من هاليهودى أكيد هو اللى حرك الحكله1006

يحرك كلبه ان شاءالله والله انكهرنا من اللى صار وزعلتينا يا همسه

بس هاى الدنيا طالما فى خير وشر هيك بتصير

تسلمى يا همسه1007

وهياتناا لسه كاعدين ابنستنى فى الباكى ( الباقى ) من الحلكات

همسة

08-08-2005, 09:17 PM

بسم الله الرحمن الرحيم

المتابعة الجيدة بصفة مميزة طبيبة مسلمة

هذه بدايات الجرح والألم الفلسطيني.. ولازال الجرح ينزف

دعينا نستكمل معاً بقايا الجراح الجرح تلو الاخر وكأنها مغزولة معا

لتشكل سلسلة حديدية خانقة حول اعناقنا..

كل الروعة في تواجدك.. فلا تختفي!!!

اختك

ابو حمدان

08-09-2005, 12:05 AM

بسم الله الرحمن الرحيم

الاخت الكريمة همسة

احترامي لك و لقلمك

الحقيقة في هذه الحلقة انك استطعت اثارة مشاعري لدرجة انني لم استطع منع دموعي من ان تتساقط الما و حزنا لما حل بحقلنا و ضيعتنا و قريتنا، و تذكرت ذات يوم كنا في رحلة من غزة الى الاقصى الشريف - لأداء صلاة الجمعة - و كانت طريق المرور بئر السبع الخليل وصولا الى القدس الشريف.... فما ان عبرت الحافلة التي تقلنا الحاجز المسمي نحال عوز شرقي مدينة غزة... و كان يرافقنا عدد من كبار السن والدي و اثنان من اقاربي و اخر من المخيم و كلنا من بادية بير السبع .. اقول ما ان تجاوزنا نقطة الحدود الفاصلة بين غزة و السبع المعلومة و اذا باحد المسنين يصرخ بعلو صوته .... يا ناس هذي بلادنا الله اكبر .. الانجاس طردونا منهي ... نظرت يميني و كان يجلس الوالد فاذا بدموعه تنهمر بغزارة و كناقد وصلنا الى مضاربنا ( التي يشقها الشارع الرئيسي الواصل الى مدينة السبع ) و نظرت خلفي و كان يجلس قريبي و ابنه و اذ بهما لا يقلان عن ابي في بكائهما الصامت .

كنت اقرأ كلماتك و تذكرت موقف آخر ذلك الموقف الذي مرت به الجدة ام احمد و غيرها من آبائنا و اجددنا ... تذكرت ذلك اليوم الذي ذهبنا بمعية الوالد و رافقنا في ذلك اليوم عدد من اقاربي المغتربين ... - و كنا كذلك في رحل للأقصى الشريف - ... و لكن كنا في سيارة خاصة كنت اقودها بنفسي ... في الطريق طلبنا من الوالد ان يعرفنا بمضاربنا و قد توقفنا في اكثر من مكان ( ساعدنا في ذلك فصل الصيف حيث كانت معظم اراضينا خالية باستثناء بستان للتفاح مجاور للطريق ) و من ضمن المناطق التي توقفنا بها تلة كان جدي للوالدة قد اقام عليها ما يعرف بال- بايكة - و هي عبارة عن غرفة كبيرة جدا تسع لآسرة كاملة مع ما تمتلك من حبوب و تبن و مونة ... قامت قوات الاغتصاب البغيضة بتجريفها لمحو اي آثار قد تدل على ان اناس كانوا يقيمون هنا .

ذكرت هذه القصة لأنني وجدت في مكان الاطلال ما يعرف - بالقٌلّة - و هي فارغ مقذوف الدبابة و لمن لا يعرفها كتلة حديدية كثيفة اسطوانية الشكل مجوفة كانوا يستعملونها لهرس الحبوب ، المهم اصطحبت هذه القطعة و كنت كمن وجد كنزا اثريا غاليا عليه لما له من ذكريات ... المهم عندما عدنا في المساء .. كالعادة نزلنا في - الشق - و هو ديوان العائلة .. كان يتنظرنا خالي و بمجرد ان رأى ما احمل و قبل ما ينطق بحرف واحد و اذا بنهر من الدموع يجري على خدية .. كنت اعرف انني احمل شيئا ثمينا لكني لم اتوقع ان يكون مثير للعواطف.. - سألت الخال ليش البكا يا خال - قال لي يا ولدي هذه قلة عمي و اتذكرها جيدا و قد ذكرتني بالبلاد و ايام البلاد.. المهم القلة اتولت عليها احدى خالاتي مدعية انها احق مخلوق بها و سامحتها

اللاخت الكريمة همسة

كتبت ما سبق و انا اشعر بغصة التشريد و اللجوء و الغربة ..

ما تكتبينه بحق و لو كان من الخيال فهو خيال حي و لا يمكن لنا ان ننساه

نسأل الله القوي العزيز ان يقض لشعبنا من يقوده للخلاص تحت راية التوحيد

و ان يخلص شعبنا من الزمرة الفاسدة

و ان يعيد كل مهاجر و لاجئ و نازح لضيعته و قريته و مدينته

الاخت الفاضلة همسة

بارك الله فيك مع رجاء عدم المؤاخذة لاقتباس بعضا من لهجة الجدة ام احمد في المداخلة السابقة

بالمناسبة كما تلاحظين ردودي بسيطة و لكنني ممن يتفاعلون بتاريخنا وتراثنا و اندمج كثيرا مع حكايا الآباء و الاجداد الذين هم عبق الماضي و نور المستقبل ، من عطائهم و ذكرياتهم نستلهم الهمة و العزيمة و الاصرار فكما كانوا شموعا تتوقد لينيروا لنا الطريق فلا بد و ان نكون خير من يخلفهم لنواصل طريقنا نحو المطالبة بحقوقنا المسلوبة غصبا ، لعلنا او ابنائنا نقدر في يوم من ان نسترجع حقوقنا المغتصبة ...

و نعاهد الله سبحانه و تعالى ان لا نتهاون و لا نتنازل عن ذرة تراب مقدسة شرفها المولى عز و جل بمباركتها في كتابه الكريم اذ يقول سبحانه في اول سورة الاسراء ( سبحان الذي اسرى بعبده ليلا من المسجد الحرام الى المسجد الاقصى الذي باركنا حوله لنريه من آيا تنا انه هو اسميع البصير )

و لك تحياتي و الاحترام

اخوك

ابو حمدان ( البدوي )

همسة

08-09-2005, 02:17 AM

بسم الله الرحمن الرحيم

هو ذا بالضبط ما ا ردت الوصول له في حكايا ام احمد.. إلى تفاعلك وتفاعل اخوتي واخواتي هنا

اريد منهم أن يشعروا بالحنين لقراهم ولمدنهم المغتصبة بالداخل.. أم أحمد هي جدتي وجدتك.. وحقلتها التي حرقت هي حقلتي وحقلتك.. وما سيحدث بعد ذلك ما حدث لي ولك.. وما تعيشه هو ما اعيشه انا وانت..بداية الجرح وبداية النزف الفلسطيني.. هو بالضبط ما تعنيه أم أحمد بحكاياها.. عشق للتراب.. وعشق للشجر
وكم اعشق الشجر وكم أعشق التراب!

ايضا قصتك في الدموع عشتها ذات مرة.. فذات مرة ذهبت والدتي لزيارة خالتي الموجودة في مدينة اللد ( مدينة بالداخل المحتل ).. وهناك مرت على قريتها.. هي وأختي الكبيرة..

عرفت على الفور العنبة ( شجرة العنب ) التي زرعها جدي وهي لازالت ( 8 ) سنوات.. فنزلت.. وجلست تحت ( العريشة ) التي تصنعها فروع الشجرة الممتدة أمامها.. وأخذت تلامس الاوراق ( حنيناً ) لها.. واستشعرت بأيدي جدي - رحمه الله - تلامسها.. ورأت أيضا الحاووز ( مضخة ماء صغيرة ) وقامت بـ ( ضخ جزء من الماء في كأس ) وغسلت يدها ووجهها.. وكأنها انتشقت معاني الحياة...

يومها خشيت من اليهودي الذي يسكن البيت ( بمفهوم أخر الذي اغتصبه ) أن يزعجها أو يطردها.. خرجت ( اليهودية ) صاحبة البيت.. وكم شكرتها والدتي لانها سمحت لها بالبقاء لفترة قصيرة تحت ( شجرة والدها ) واحضرت لها طبقاً ( وقطفت الثمار ) وأعطتها لوالدتي على سبيل ( الهدية ) لتأكل منها... جرت دموع والدتي على عنقود العنب.. فوالدها يزرع.. والـ ( يهودية ) تتكفل بأن تعطيها لـ ( والدتي ) على أنها ( متسولة ) !!!!

أخي أبو حمدان البدوي.. جميل لقبك بهذا النحو.. لفت انتباهي شيء جميل.. لماذا لا يكون لقبنا باسم قرانا المدمرة او أصولنا وجذورنا.. فمثلاً .. ( همسة غزة )، ( أبو حمدان الـ ... ) ، ( طبيبة مسلمة ... )؟؟؟ أعتقد ستكون لفتة جميلة تعيدنا نحو الجذور قليلاً...

سأعقد لك محاكمة لاستيعابك بعضاً من الفاظي في ردودك؟؟ عفواً فإن أم أحمد من سيحاكمنا جميعاً على سرقة قصفتها من بين ضلوعها، فقد حفظتها لأنها عاشت التجربة وأنا اخرجت ما بقلبها ومنحته لكم هدية منها.. دون علمها،،،، بل بأمر منها..

لا تدري اخي العزيز كم يسعدني ترك مشاعرك في صفحاتي المتواضعة.. وأتمنى منك اخي بألا تحرمني من تواجدك المستمر في كل يوم داخل هذا النزف الفلسطيني.. فلنتقاسم الألم معاً .. حتى لا تقتلنا المرارة.. فالجرح واحد.. والقلب واحد.. والنزف وإن اختلفت درجته واحد.. آه يا قلبنا الملتاع شوقاً وحزناً.. آه يا وطن.. ذبحوه في عز الشباب.. آه يا لهفتنا.. على كل شبر من ترابنا.. وحتماً اخي عائدون وباقون..

كل محبتي

أختك

همسة

08-09-2005, 02:40 AM

الله الرحمن الرحيم

كيفكم.. بعرف اني ظايكتكم المرة الي مركت.. بس غصب عني... كانت المصيبة يا جماعة كبيرة علنا وما كدرنا نتحملها بس يلا الله يلي بيفرجها علينا وعليكم..

يلي كان عالباب. كان سمسار بكرية جنبنا عرفتو انا من حطتو الي ما الها لون غير لون المصاري الكديمة، كعد مع جوزي بالحوش.. عملت الهم كهوة ان شاء الله بيطفحها كديش بكرهو.. السمسار كان معو اليهودي

كال اليهودي...انت عارف خبيبي أنه ارضك هلكيتي ما بتنزرع ولا بتنكلع.. هلكيتي ارضك صارت بور
ايش بدك تعمل يالمسكين؟؟ بيعها الي.. وانا بساعدك بكل شي بحياتك عشان تكوم على رجليك مرة ثانية

كام السمسار الله لا يكيمو كال: يا عمي ابو احمد، انت عارف انه ارظك كان ارظ زراعية، هلكيت ما فيها تنزرع من هسا لخمس سنين، ايش بدك تعمل بهالـ خمس سنين؟؟ بس كولي من وين بدك تطعمي الصغار والكبار، وكلو ما بيرحم بيكول هات هات، فش حدا بيكولك خود...

جوزي رغم جراحو ورغم كسرت نفسو على ابوه وعلى ارضو.. وكف.. واخد فنجان الكهوة.. من اليهودي ومن السمسار.. انا ظحكت ظحكة مكتومة وكلت اريح، مش كلت انا ان شاء الله يطفحو.. هيو طفحو خخخخخخخخخخ بدكو الصراحة انا استخسرت فيهم فنجان الكهوة..

وطردهم جوزي برة..مثل الكلاب.. عوو على الباب وكأنه ما حدا سمع منهم حتشي.
اشتغل جوزي عامل.. بارض مختار الكرية. عامل عامل.. مش مشكلة المهم ترجع همتو وترتفع عالية نفسيتو
نفسو كانت عزيزة عليه.. بس الحياة بدها تستمر... واتعلمو يا اولادي.. لما الظربة ما تكسركم.. اوكفو على رجليكم من جديد ولا تخلو المصايب تهزمكم.. أنتو بعون الله وبإرادته الأكوى إن شاء الله.. بس كولو يا رب كولو يا رب وهو بيوكف معكم.

ومركت الشهور والأيام.. وانا وحماتي بنطبطب على هالزلمة المسكين.. حماتي كانت تنكني بين لحظة والثانية
بس لخاطر هالمسكين.. كنت اسكت.. وبدكم الصراحة انا صرت احب نكها،، النسوان ما بيعرفن يعيشن بلا نكير، وبلا كيل وكال.. وبنبسط الواحد على حكياتها،، يكصف عمرها حماتي صرت احبها.. عارظ يحبها كديش بحبها.
...
ونادت مرت عمي ( أم اسماعيل الداية ) وظلو معي بالاوظة وانا اصرخ وهم يكولو ادعي يا صفية ادعي ترجع حكلتكم زي زمان، ادعي يبعد ربنا عنا شر اليهود، ادعي يا صفية.. والله صرت ادعي وما بعرف ايش بكول بس المهم كنت احكي..
وزغرتت حماتي يوي.. واجانا محمد... يوي.. بكرنا بالولد.. يوي.. وبعد الهم ربنا عوضنا خير يوي.. وربنا كريم للي عايز ينسعد لولولووووووووووووووي

اجاني أبو احمد.. ربي يسعدو.. لايك عليه الاسم.. فرحان.. مبسوط.. كأنه اليوم رجعت الو الحكلة، وكأنه باس ايد ابوه كبل ليجي، الله يرحمك يا عمي..

كالي ( ربنا يخليكي يا صفية، اليوم بس.. ربنا فرحني بعد موت ابويا وحرك الارض ) ابنا محمد.. لازم يطلع فلاح متل ابوه وجده.. لازم يحافظ عالارظ...

كلت له.. ( ان شاء الله يا ابو احمد )
اطلع في وكالي ( ربي يسعدك ) زي ما اسعدتيني.
كلت له.. ( الي من عند ربنا يا محلاه )
واجت حماتي..جابت الحلبة.. واعطت ابو احمد.. وباعت حلكها.. يرظى عليها باعت الحلك عشان تعمل اسبوع لابنا محمد..
وعملت اسبوع محمد.. ما حلمت بعد هالظروف الي وكعنا فيها ينعمل الو هيك اسبوع.

وزعت شمع وحامظحلو على اولاد الكرية..

وعزمت كل الفكرا.. وغدتهم...

وطهرو احمد ومحمد، واتبرع المختار ( بخروفين هدية ) لأحمد ومحمد من المختار، الله يسعدو كديش المختار كان بيحب ( أبو احمد ) وبيعتبرو متل ابنو .. وكام شباب الكرية بعمل (حلقة الدبكة) وظل الشباب في الكرية يدبكو ووزعت مرت عمي عليهم الراحة والشراب. و ثاني يوم ركبو أحمد ومحمد مع أبوهم على ظهر فرسة المختار ولففوه كل الكرية ودار الشباب بالطبل والمزمار وراه.

أما نسوان الكرية كانن يغنن..

جـانـا الـمـطـهــر راكــب الـنـجـديــة * * * طـهــر حـبـيـبــي وروح بالـفـضـيــة
جـانـا الـمـطـهــر راكــب الـنـعــامـة * * * طـهــر حـبـيـبــي وروح بالـســلامــة

طبيبه مسلمه

08-09-2005, 06:21 AM

تسلمى يا همسه على هالحلكه الحلوه0036

بس انتى خربطتى 1011 هذا مفروض يكون الولد التانى لأم أحمد

انت كلتى فى حلكه سابقه انها جابت أحمد وانه جدو فرح كتير عليه

هيك انا والله اتخربطت ولف راسى1009

يا ريت تتأكدى عشان ما اتخربط

والك كل الشكر والتحيه

طبيبه مسلمه فلاحه( بيت لحم ) 1007

همسة

08-09-2005, 06:38 AM

بسم الله الرحمن الرحيم

طبيبة مسلمة ( بيت لحم )

صباحك متل النرجس والفل والياسمين

هو مش انا الي خربطت، هادي ستك ام احمد الي لخبطت، تعالي نسألها مين الي انولد بعد الحكلة؟؟؟

وشوفي هي ايش بتقول؟؟

راح تقول إلك ( هو أحمد انولد كبل ليموت عمي الله يرحمو، أيوة ايوة الي انولد بعد موت عمي كان محمد.. يؤيؤيؤ معلش يا بنتي الكبر عبر اصلي ست كبيرة وكتير بنسى )

مش كليلة ام احمد طلعت منها ههههههههههه وهينا رجعنا عدلنا كلامها عشان يعجبك...

بجد كانت دفاتري ملخبطة معها... ربنا يسعدك يا رب

كل محبتي لتواجدك

اختك همسة ( نصف لاجئة، ولكني توارثت من نصفي الجميل أن الوطن يولد فينا إن لم نولد فيه )

almajd

08-09-2005, 01:02 PM

ما حدا كليل يا همسه اذا ام احمد كل هذا طلع معها كيف ام صبري وام عبد الحفيظ.
ما زلت انتظر المزيد من سلسلة ام احمد

طبيبه مسلمه

08-09-2005, 04:06 PM

أهلا همسه ان شاءالله تكونى بخير

سلامتة عكلها ستى أم أحمد0036 الله ايعينهاا ما هيا شافت كثير فى زمانها

معلش ابنعذرهاا

وعلى رأى المجد هاى ستى أم أحمد مش كليله1011

نسيت اكولك همسه كديش أثرت فيا كصة أمك لما راحت تزور بلدها ودالية العنب1006

موكف كثير بكانى وما نكول غير حسبى الله ونعم الوكيل وكل ظالم واله يوم

واحناا حكناا ان شاءلله برجع باءذن الله

تسلمى يا همسه1004

العقرب

08-10-2005, 09:50 AM

توقيعك يا طيبه مسلمه رجعني لتنور الطابون وقصص ام احمد فيها صوت فلاحي وزعتر بلدي

أمجاد

08-10-2005, 02:35 PM

ماشاءلله عليكِ يا طبيبة منسجمة مع كصة الحجة أم أحمد ;)

استمري عزيزتي همسة...:)

همسة

08-10-2005, 03:28 PM

بسم الله الرحمن الرحيم

المجد

توقيعك رائع بروعة تواجدك هنا

طبيبة مسلمة

اثرتي فضولي لمعرفة الانسان الساكن في قلبك.. فهنيئاً لقلبك

أمجاد

تواجدك جميل.. بجمال الماضي وعبق التاريخ

العقرب

أهلاً وسهلاً بتواجدك مع سلسلة حكايا أم احمد

جميعاً...

أمي هي أمكم.. وأم احمد جزء مني ومنكم... ولنتابع..
باقة جوري توزع لكل منكم باسمه

كل محبتي

أختكم

همسة

08-10-2005, 04:16 PM

بسم الله الرحمن الرحيم
شفت بالحلم...
انه عيون زرك.. وخظر.. بتمشي.. بكريتنا
ويكلعو كل العشب الاخظر.. وياخدو من هنا ومن هناك
ويكطعو البرتكان والكلمنتينا والكرفوت
ويمسكو الورد ويفعصوه برجليهم بس الورد يطلع مرة ثانية
صح بيطلع بالاول دبلان لكن بعد هيك يرعرع من اول وجديد
العيون ما سكتت لهنا
مسكتني من ايدي وكان في جرح كبير بيدي
ورمتني ببير عتمة
صحيت من النوم مفزوعة.. حكيت لابو احمد عن الحلم تبعي
كالي استغفري ربك واستعيذي بالله من الشيطان الرجيم
استغفرت ربنا
وكمت
وصليت اكمن ركعة وكعدت اسبح لحد مرحنا عالحكلة
لكن يا جماعة الخير.. ضل الحلم طول النهار ببالي
وانا لما اتزكر الوردات مرة اظحك ومرة ابكي
وابو احمد يخفف عني ويكولي هي حلم مش اكثر لا تكلكي حالك على الفاظي
رجعنا من الحكلة كانت حماتي تستنانا
حطيت الكراصية على النار وبديت استويها
وكعدت اطبخ لابو احمد ربي يباركلي فيه
راح تكولو الي وين احمد؟
بكول الكم انه احمد نور عيون امو صار عمرو هلكيتي سنتين ومحمد عمرو سنة
صار يكعد، ويجري ويلعب.. كنت اخدو معي عالحكلة
يمسك الرملات ويحطهم باصابعو الزغار ويطلعهم مثل الي يمسك بيدو
المذراة
ويرفع فيها سنابل الكمح عشان تنفصل عن التبن
كنت احب انه يكعد تحت التينة
عشان يعرف انه التينة هاذي تبعتو
انتو راح تكولو بمخكم كيف رجعتو ثاني للحكلة مش انحركت؟
بكول الكم انه احنا بدينا من اول وجديد
بعد مصار يشتغل ابو احمد عند الناس بالاكرة
لغاية مكدرنا نرجع مرة ثانية على حكلتنا
وبدينا خلال المدة الصغيرة هادي زرعنا تينة جديدة
وكان ابو احمد يبتسم ويكول
زرعها ابونا النا.. خلونا نزرع لاولادنا
الله يرحمك يا عمي
وهيك كنت اخد احمد معي عالحكلة و محمد اتركو بالدار عند ستو
وكان ينبسط كتير ويلعب بهالتراب وهالارض
لما ينام كنت انيمو على كيس خيش.. انا طرزتو باحلى الوان احمر واخضر وازرك
ورسمت عليه كتير ورد
عشان يطلع احمد بيحب الورد
لكن بردو الحلم تبعي كان مضايكني كتير كثير كثير لغاية...
بحكيلكم لما ارجع

طبيبه مسلمه

08-11-2005, 03:14 AM

أهلين أختى همسه44445

تسلمى على كلامك الحلو

هلا أختى أمجاد والعقرب تسلمو1004

الله ايعينهااا ستى أم أحمد هالحلم تاعبهااا بس ان شاءالله خير

وما شاءالله احمد كبر وصار يروح عالحكله 1007

وينتا بيصير زلمه 1011

الكصه كلمالهاااااما ابتحلووو

تسلمى يا همسه وهياتناااااا كمان بنتابع مع كاسة الشاى بالمريميه0036

ابو حمدان

08-11-2005, 09:21 PM

الاخت همسة

رائع و جميل ما تكتبين

آآآآآآآآآآآآآه كم تصرين على دغدغة ذاكرتنا او اعادة الذاكرة لنا

الله الله

اتذكر عندما عندما كان يصطحبني والدي معه على " مقثاة " البطيخ او مزرعة الخضار التي لم تكن تبعد كثيرا عن المخيم ،

كما اتذكر عندما اخرج فجرا ( حتى يلحق السوق ) في معيته الى سوق الحسبة في فراس و هو يجلب ما رزقه الله من ثمار زرعه.

او عندما كنا نجري خلفهم في " الحصيدة " موعد حصاد الزروع قمح ... شعير ... عدس ... حمص

او عندما كنا نركب على " اللوح " لنكون ثقلا مساعدا لهرس القش و فصل الحبوب عن السنابل

ذكريات عديدة يا همسة

كثيرة ما هي نستذكرها في مناسباتها

سقا الله ايام الطفولة ما احلاها او اجملها

جميلة هي طفولتنا رغم ما فيها من مشقة

كان اهلونا يلحقوا الليل بالنهار ليوفروا لنا لقمة عيش كريمة لنحيا حياة عزيزة

رغم انهم ارغموا على ترك اراضيهم إلا انهم كانوا يعلمون انه لا عزة لهم الا بتمسكهم بالارض، و رغم انهم كانوا يعملون ب " الكروة " تارة و بالمشاركة تارة اخرى فإن عطاءهم كان بدون انقطاع ايمانا منهم بضرورة البقاء حتى يوصلونا لبر الامان.

و قد زرعوا فحصدنا

بارك الله في آبائنا و امهاتنا و جزاهم عنا كل خير
اللهم ثبت والداي على الايمان
و اطل في عمريهما لعبادتك
و احسن لهما في الدنيا و الاخرة
و اصلح لهما الدارين الاولى و الاخرة
و اختم لهما بصالح الاعمال
" و قل ر ب احمهما كما ربياني صغيرا "
" رب اغفر لي و لوالدي و للمؤمنين يوم يقوم الحساب "

اللهم امين .. اللهم امين .. اللهم امين

مع التحية و الاحترام

ابو حمدان

طبيبه مسلمه

08-11-2005, 11:54 PM

أهلا همسه كيفك0036

لى يومين بدور على معرضك للتراث مش لاكيته

وين راح والا وين مخبى والله ما نى عارفه1006

بروح وبيجى وما بشوف الا كصة أم أحمد الله يسعدها ويسعدك44445

يا ريت تكوليلى وينه المعرض تحت أى عنوان بدناا نتسوك فيه

تسلمى يا همسه 1014

ما تتأخرى عليناا بحلكة أم أحمد هياتنا ابنستنى ومتشوكين1004

طبيبه مسلمه

08-14-2005, 03:03 AM

أ ختى همسه وينك 1009 طولت الغيبه

اللهم اجعله خير1007

كل تأخيره وفيهااا خيره

ان شاءالله تكونى انت وستى أم أحمد بخير1017

ترجعيلنااااا بالسلامه ان شاءالله0036

أمجاد

08-14-2005, 12:23 PM

السلام عليكم

عزيزتي طبيبة حياك الله...اختي تجدين موضوع معرض التراث الفلسطيني للاخت همسة في المنتدى العام تحت عنوان : لكل انسان وطن يعيش فيه إلا نحن الوطن يعيش فينا

وان شالله ترجع لنا الاخت همسة بالسلامة...

طبيبه مسلمه

08-14-2005, 03:54 PM

أهلا أختى أمجاد44445

تسلمى وشكرا الك1004

وشكرا للأخ سعيد1016

بارك الله فيكم0036

همسة

08-15-2005, 02:52 AM

بسم الله الرحمن الرحيم

ظل الحلم يطاردني مدة طويلة
وكل مرة اشوفو اصحى من النوم واكلك
واظل كلكانة طول النهار
مش عارفة هالعيون الملونة شو بدها مني
مش عارفة والله
بعد كمان سنة الله اعطاني بنت سميتها بدور.. حماتي زعلت.. بدهاش بنات
طيب هو انا الي جبتها مش الي من الله يا محلاه، بعدين معنا ولدين زي الكمر احمد ومحمد الله يحرسهم من العين يا رب.
البنت او الولد بيد ربنا.. وهنا بكول لكل الزلام يلي ربنا اعطاهم بنات
ليش تعملو مشاكل لنسوانكو النسوان مثل الارض شو بتزرع بتحصد
كمان هادي رزكة بيد ربنا ما في داعي انه انت تزعل حالك وتنكد على حالك عشان ربنا اعطاك بنت
احمد ربك عليها، احسن من الي ربنا ما بيعطيهم اشي وبيضلو محرومين كلمة يابا او يما...
وكنت اخدهم معي عالحكلة يا ربي ما احلاهم وهم بيلعبو فيها، والله بحياتي ما بنسى كيف كانو يلعبو
ويجرو وابوهم الله يحرسو من العين.. كان متل الغول يخاف عليهم من نسمة الهوا

http://www.shammout.com/gifs/oil-ismail/422big.gif

http://www.shammout.com/gifs/oil-ismail/305big.gif

لما ربعنت بدور
اجى المعلم أبو خليل بمدرسة الكرية ونادى على ابو احمد
يا ابو احمد .. يا ابو احمد
طلع ابو احمد وهو متسروع من الفزعة
ورجع بعد دكيكتين وجهو أسود وعركان ومكلوبة حالو
خير يا ابو احمد ايش فيه سألتو وانا بجيب الو الجزمة ( الله يعزكو )
كالي ولا اشي خليكي وانا هلكيت راجع
كلت له لا بس فهمني وين رايح؟؟
صرخ علي بصوت عالي وكالي هلكيت برجع خلص كلت لا تعصبيني
اول مرة يصرخ علي؟؟ غريبة
اكيد صرخ علي علشان اشي كبير
ربنا يستر
اطلعت في امو
كالت الي يمكن بدو يعمل اشي ما بدو اياكي تعرفيه؟
زي ايش مثلا يا مرت عمي
زي مثلا انو يتجوز
كلبي وكع.. يتجوز؟؟ ليش انا في ايش كصرت علشان يتجوز علي؟
بعدين ايش خص المعلم بالجواز.. هادا لمعلم اساسا مش من كريتنا
هو بيشتغل بس بكريتنا
والناس كتير بتحبو وبتحترمو ومعهم حك مش معلم؟؟
سالتها العكربة ( وايش دخل المعلم في جيزتو؟؟ )
كالتلي بكل لؤم.. يمكن ابو احمد بدو يتجوز معلمة معو بالمدرسة؟؟
نزلت هالكلمة مثل الصخرة.. معكول؟؟ ابو احمد؟؟ ما بظن يا جماعة لا لا ما بظن
رجع ابو احمد
وانا ناوية عالشر
- وين كنت؟
- من وكتيش بتكوليلي وين كنت؟
- من هلكيت؟
- روحي انخمدي ونامي.
- انخمد؟ ليش ليش بس فهمني
- مش رايك يا بنت الناس، خليني بهمومي..
- همومك ( انا هلكيت روكت اشوي ) وايش همومك يا نور العين؟
- هلكيت بتحكي بركة وبنعومة ما شاء الله مثل النسمة صرتي وكبل شوي كنتي متل الاسد بدتتش تاكليني.
- اصلو امك كالت لي بدك تتجوز علي.
- ( بكهر ضحك ) اتجوز..
- عشان هيك بتصرخي علي وتغوشي لا ما بدي اتجوز.. بس..
وسكت وما راح احكي ليش حكى بس.. الله يستر من الجاي .. الجاي والله صعب يا صفية
كلبي وكع.. ربنا يستر

همسة

08-15-2005, 03:04 AM

بسم الله الرحمن الرحيم
أولاً أعتذر لتغيبي عنكم طيلة الفترة السابقة، هذا كان بسبب خلل في الشبكة العكبوتية لدي.. لكني بالفعل اشتقت لكم ولتواجدي بينكم.. ما شاء الله ثلة جميلة ورائعة من الاخوة والاخوات..

طبيبة مسلمة..
قد عدت اليكي مع حكايا ام احمد، وقد امتلأ الخوف داخلها وبدأ يتسرب في كل خلايا جسدها، هي محقة، فالانسان احيانا يستشعر بالخطر، ولا يكفي ان نرى النار تشتعل في بيوتنا كي نقول ان هناك ناراً يكفي فقط ان نرى الدخان!!!

ابو حمدان
كنت بالماضي حين كنت في سن الطفولة والمراهقة، كنت اذهب إلى حقلنا، واذهب مع والدتي ووالدي - رحمه الله - فنلتقط الثمار، وأجمل الذكريات كانت في ( جد الزيتون ) ما اروعها من ذكريات، الكل كان يعمل من الختيار وحتى الاطفال، الشباب يصعدون لاعالى فروع الشجرة ويبدأون في اسقاط الثمر على الارض، تقوم النسوة والختيارية بجمع الحب ووضعه في اكياس ( خيش ) للسرب ( الفرز ) ثم اما العصر أو التخزين...

وهناك ذكريات جميلة، سبحان الله جمعتنا الذكريات الجميلة، كما جمعتنا الذكريات القاسية، حين جرفوا ارضنا وزيتوناتنا؟؟؟

أمجاد
كلنا نحب أم احمد، ليس لأنها شخص ظريف يقدم لنا النكات، بل لأنها جعلتنا جميعا نضع العطور جانباً ونبدأ بشم الماضي من خلالها..

جميعا
كل محبتي لمتواجدكم وباقة من الجوري والريحان.. مهداة لقلوبكم

أختكم

همسة

08-16-2005, 01:05 PM

بسم الله الرحمن الرحيم
هلكيت هو كالي بس..،،، بعد مروك كلبي انه ما بيتزوج..
كالي وهو حزين ( بس أنا حاسس انه في اشي بيصير غلط بالبلد )
اليهود بيشتريو هالارظ.. وبيبنو عليها.. وعصاباتهم صارت تكتل..
وكبل اكمن يوم سمعت انه في زلمة اسمه بل بل .. بل ايش يا رب؟؟ أيوة بلفور!
وعد هادا اليهود انه يبني الهم وطن بفلسطين.. وكأنه فلسطين ما الها صحاب.. وكأنه صحاب العيون الزرك البريطانيين اشترو فلسطين وهم صحاب فلسطين وبيبيعو وبيشترو فيها كيف بدهم.
- هو مين صاحب فلسطين... يا أبو احمد؟
كالي ابو شنب يوكف عليه الصكر.. فلسطين هادي ارظ وكف اسلامي.. لا بتنشرى ولا بتنباع..
- يعني ممنوع حدا يبيعها وممنوع حدا يكول انها اشتراها

صرخت انا وكلت يا سبحان الله ومين هادا بلفور يجي ويبيعها لليهود؟؟ اخصفخص عليه لعنة الله عليه الله يحركو الله يحركو..
هو كالي ان شاء الله بينحرك بنار جهنم.. زي معمل هيك.. أي والله لو صار الي بيخطط الو هالملعون كولي عن فلسطين الله يرحمها..

لما كال هيك.. تخيلت فلسطين عروسة مزينة.. بشجر البرتكال.. وبزهر الياسمين.. مكفنة بفستانها المطرز... حسيتها عروسة مكتولة مطخوخة باكمن عيار يوم عرسها.. اطلعت على وجها الحلو.. وحزنت عليها وهي مكتولة ...
حسيت بأنه كريتنا راح تصير خراب.. ويعشش فيها الغراب، لا تكولو عني متشائمة، لكن كلب المؤمن دليلو، وانا كلبي ما خيبني دايماً مش راح يخيبني هلوكيت..

كلت له عشان بس اطمنو.. لكن الفار لعب بعبي انا.. كلت له..
وكلها لله يا زلمة.. العرب كلهم بيفدوها.. ولو تخلو عنها الها ولادها بيحموها.. وبيدافعو عنها بارواحهم..

اطلع في.. ومسكني من كتافي وكالي..

لو صار في حرب راح اروح عليها سامعة؟ بتخلاش عن ترابنا أنا... وإياكي تكولي امك .. أنا .. الاولاد.. اياكي تكولي هيك.. سامعة؟؟
روح الله معك.. ولو في نسوان خذني معك.. علمني كيف امسك البارودة وكيف اطخ فيها، علمني كيف اكتل واحرك الي بدو يكرب بس من ذرة تراب .. أنا بعرف.. انه الوطن غالي والتراب اغلى من الدم.

بس نزلت دمعة حزينة من عيني.. ما تخيلت منظرو متل فلسطين يرجع لي عريس ومكطوف شبابو يوم عرسو..
تخيلتو.. جندي بيكاتل عشان بلادو.. وزادت هيبته في كلبي.. ما استرخص الرخيص وما باع الغالي.. لوبالنفيس

نزلت المفتول عن النار.. وحطيت الو بالصينية وعليه اليخني.. ونادينا مرت عمي... واحمد صار ياكل ما شاء الله حوله وحواليه....

واجت مرت عمي.. وكعدنا ناكل... بس عكلي وعكلو.. كان في ابن الكلب الي اسمو بلفور.. الله يحركه بنار جهنم ويشويه شوي...

وكانت أخر مرة ناكل بكريتنا مع سوا.. عشان هيك ما بنسى هالأكلة أبداً.. طعم المفتول لسة بتمي.. عشان طعمو كان من طعم كريتنا..

طبيبه مسلمه

08-16-2005, 03:24 PM

هلا همسه00113

هس معكوله ابو شنبات بوكف عليهن الصكر يتزوج على حبيبته ستى ام أحمد

هدول النسوان عكلهن اصغير 1007مع احترامى لستى أم احمد

اخ على المفتووووول شهيتيناا عليه يا همسه ممممممممممممممم1011

وعلى كد ما كنت بستنى كصةام احمد على كد ما ازعلت على صار واللى لسه بدو يصير

ربنااااا يستر1006

الله يوخدهم هاليهود ويريحنااا منهم1022

اللهم آمين

وهياتناا ابنستنااااا الحلكه الجايه ومعنا فنجان الكهوه1030

وربناااااا يستر

همسة

08-18-2005, 02:06 PM

بسم الله الرحمن الرحيم

الألم قادم..

الدمع قادم..

فهل سنقاوم؟؟

كل محبتي واحترامي لوجودك اختي طبيبة مسلمة معنا

تابعينا... لازالت الحكايا مستمرة

أختك

همسة

08-18-2005, 02:22 PM

بسم الله الرحمن الرحيم

تعالو انتو زهكتو من الكصص، تعالو خلص راح احكي هلكيت في ناحية تانية من حياتنا.. انكلبت حياتنا بعد هيك كلبة غيرت الطريك والامان الي كنا عايشين فيه..استفحلو اليهود بهالارظ، وافترو كتير وأبو شنب يوكف عليه الصكر التحك بالجهادية،، كنت كتير بشتاك الو بس ايش اعمل؟؟ ما بيخلو النسوان تصير مع الفدائية..

مرت عمي صارت تنزل معي عالحكلة.. وانا وهي صرنا نروح نبيع الخضرة بالسوك.. والناس إلي ما معها مصاري نعطيهم ببلاش.. والله يطرح البركة.. وكانت مرت عمي ونسوان الكرية يخبزو بالميتين تلاتمية رغيف ويوزعوهم عالفدائية.. مش هم بيكاتلو باليهود الله يهد كواهم؟؟

الكرية صارت فاظية من الرجال.. ما فيها غير كمشة صغار ونسوان..
وختيارية الكرية البركة..
ما كانت بتيجينا اخبار كثير من ابو احمد.. مرة يكولو النا انه بنابلس.. ومرة يكولو النا انه بجنين ومرات كثيرة يكولو النا بيافا... لكن هو وين ما حدا بيعرف..

بأول الثمانية وأربعين حركو اليهود كتير دولومات اراظي لناس من عنا وذبحو كثير ناس
ما عرفنا ايش نعمل، كنا كثير عددنا كليل بالكرية.. ويوم سمعنا خبرية مش نافعة
سمعنا انه اليهود سركت اراظي كثير وذبحت ناس كثير بالكرية الي جنبنا..
ورحنا نشوف انا ومرت عمي وتركنا الاولاد والبنت عند مرت جيرانا ام سعيد.
ليتنا متنا كبل نروح، كانو ذابحين الكرية كلها.. كانت محروكة حرك كرية دير ياسين..

يلي حجارها من صخر منحوتة بكلب الوادي... كانت محروكة.. الرجال كانت مكتولة ومحطوطة بالبير

http://www.alsairafy.com/picpal/data/thumbnails/1/Jerusalem-Dayr-Yasin.jpg

http://www.bayynat.org/www/arabic/monasabat/april/gif/ph_ruins11.gif

http://www.fonjallaz.net/Film-Amen/Infographie_Amen/Ruines-Deir-Yassin.jpg

http://electronicintifada.net/bytopic/uploads/deiryassinunknown.jpg

http://www.zajel.org/pictures/Deir-Yassin_b5.jpg

http://zpravy24.pantax.cz/2005/images/04/10/ruiny_Deir_Yassin1.jpg

http://www.palestine-info.cc/uploads/deir-yassin_b1.jpg

رجال حفرت اسمها عالصخر والحجر والشجر وجنبها لا إله إلا الله محمد رسول الله بدمها..
ولكينا بكلب الاوضة هياكل عظمية لكتير اطفال مربوطة بالحبال.. جمعو الاطفال وذبحوهم ذبح
مرت عمي وصلت لدار كرايبها.. صرخت صرخة كوية بكلب الوادي..

لكت اولاد عمها كلهم جنب الحيط.. ميتين.. مسكت باثبوابهم.. وصارت تعدهم.. هادا محمد.. وهادا الكمباز تبعو.. هادا خليل,, وهاذا الخنجر تبعو.. هادا رجب.. وهذا كلمو.. هذا وهذا وهذا.. وعدتهم واحد واحد.. وهي تحظن اثوابهم وتبكي وتبكي وتصرخ..

حضنتها.. وحملتها.. بعيد عن الكرية.. ورجعنا لكريتنا مكسورين الخاطر.. والخوف من بكرة مالي كلوبنا..
ذبحوهم مثل الخرفان.. بدون رحمة ولا شفكة.. ذبحوهم... عشان ما طلعو من اراضيهم ولا سلموها لليهود..
سمعنا انه بكرية ثانية... اسمها اللكبيبة.. كل اهل الكرية طلعو.. الا المختار تبعها.. ما رضي يطلع.. رموه بالبير.. وهو لسة عايش.. بكي بالبير.. مدة لحد ممات.. وبردو ما طلع.... ما طلع.. اطلعت بمرت عمي لما وصلنا للدار

كلت الها.. مرت عمي..
لو هجمو اليهود علينا.. ايش بدنا نعمل؟
مش عارفة.. ايش انتي بدك اعملي.. انا مش كادرة اصلب طولي
مرت عمي.. بدنا نهرب ولا نبكي بالدار؟ لو رحنا؟؟ كيف يعرف جوزك طريكنا؟
ولو بكينا يمكن نموت..والله الموت احسن من هالحياة والله احسن منها
ما في حياة مع الزل يا مرت عمي ما في حياة مع الزل.

طبيبه مسلمه

08-19-2005, 11:48 PM

يا ساتر على اللىصاررر واللى لسه بدو يصير

لا حول ولا قوة الا بالله

وربنااااااااا على الظالم

حسبى الله ونعم الوكيل1006

اللهم عليك باليهود ومن والاهم

اللهم انهم لا يعجزونك1022

اللهم أرنااا فيهم عجائب قدرتك

اللهم آمين1030

الله يعينك ستى ام احمد ويعين شعبناااااا المقهوور

همسة

08-22-2005, 01:54 PM

بسم الله الرحمن الرحيم
طبيبة مسلمة
كل محبتي لتواجدك و استمراريتك معنا
فلتتابعي الهم الفلسطيني والألم الفلسطيني
اختك

همسة

08-22-2005, 02:10 PM

بسم الله الرحمن الرحيم

اجتنا أخبار من أبو احمد أنه هو عايش، وانظم لمجموعة من الفدائية بينصبو كمائن لليهود
الي موجودين بالكرى ومرة سمعنا أنه تصاوب بيدو بس الحمد لله كام بالسلامة وكان الخطر كريب كتير منا ما كنا بنكدر نطلع من باب الدار بعد المغرب، وبطلنا نروح عالحكلة، واشتكت انا والاولاد للحكلة كتير كتير

ومرة مع اذان الفجر.. سمعنا صوت انفجار كوي، بعدها سمعنا صوت شاحنة عمرنا ما سمعنا متل صوتو هيك بيطلع وبنزل مع صوت جنازير بالارظ
سالت مرت عمي.. أيش هالصوت يا مرت عمي؟ كالت هادي اكيد الدبابة الي بيحكو عنها
كلت الها وهاتي زي الفرد؟ كالت الي هادي زي التراكتور بس مغطية من كل مكان.. وبطخ على الناس
تخيلت ابو احمد.. وهادي الدبابة بتطخ عليه.. كلبي وكع.. وكلت يا رب استر يا رب
صلينا الفجر انا ومرت عمي.. ما اذن الجامع يومها.. استغربنا.. وين عمي ابو حسن بيكون راح؟
وصار انفجار ثاني.. وانفجار ثالث.. مرت عمي كالتلي لمي وحطي بالكيس ايش بتكدري تحطي
كلت الها احنا بدنا نطلع من الكرية هلكيت؟
كالت الي بس انتي اسمعي كلامي
حطيت كل الي بكدر احطو.. وحطيت اواعي لابو احمد، وحطيت شبريتو، وحطيت الفستان المطرز تبعي
وحطيت كل الي بيزكرني بهالدار وبأحلى ايام العمر الي كضيتها بكريتنا.. وحطيت معها ذكرياتي الحلوة
مرت عمي.. ما اخذت اشي، بس حطت المفتاح تبع الدار بحبل وربطت الحبل على ركبتها وكالت لاحمد
ستي حبيبي.. لو انا متت.. بتاخد المفتاح وبتحطو بركبتك وما تشلحو بعمرك.. لو ربنا ما كتب الي العمر ارجع لهالدار.. انت ارجع الها.. وكبشت كبشة تراب من الارظ وحطتو في كفها.. وباستو
وطلعنا، لكينا كل الناس بترحل..

http://www.ikhwanonline.com/Data/2003/12/1/ikh10.jpg

http://www.sfjff.org/sfjff18/programs/images/p0722b-a-3.gif

http://snapshots.palestinechronicle.com/galleries/nakba_515/images/nakba_1.JPG

http://seattletimes.nwsource.com/art/news/nation_world/mideast/photos/pg4arabs.jpg

http://palestine.91.free.fr/nakba33.jpg

http://www.alnakba.org/photo/swoman.jpg

واليهود الي في الدبابة بيطخو علينا، والطيارة بترمي علينا براميل مليانة بارود لما يوصل الارظ ينفجر
والدم هنا وهناك.. واتاري عمي ابو حسن مؤذن الجامع كان طالع يأذن طخوه.. عشان يخشو الكرية والناس نايمة
يا ويلي يا ابو حسن.. كان مستشهد على باب الجامع،،، كضى حياتو كلها وهو رايح جاي على المسجد وهلكيت...
وكانو حاركين المسجد كمان.. هدول الخنازير.. هدول المجرمين الكتلة
يا ويلي يا ابو حسن.. مين بدو يدفنك... يا ويلي يا عمي خليل،، يا ويلي يا مختار الكرية،، يا ويلي على العصافير
وعالحمام.. الي غرك ببركة الدم

ركبنا على الكارة والحمار انا ومرت عمي.. وصارت تسوك هي وتضرب بالحمار من غير وعي..
بدها نهرب.. احنا مش جبناء نهرب من ارظنا يا مرت عمي.. كالت الي لو معك سلاح انزلي وكاتلي.. ما تكاتلي هيك...

يا مرت عمي خلينا بالدار..
ما بخليهم يكتلوكي ويكتلو اولاد اولادي.. مابيكفيني ابوهم راح وما بعرف وينو
ولا انتي عايزاهم يذبحونا زي كرية دير ياسين..
والله ما عرفت ايش ارد عليها.. طيب وين بدنا نروح يا مرت عمي؟؟
لا تخافي يا بنتي النا الله... لا تخافي النا الله

الخوف والرعب كان بعيون الكل .. الاطفال.. النسوان..
الختيارية.. كان الموت غراب اسود بيلف حوالينا.. حسينا باي دكيكة تجينا كزيفة ونموت..
الشباب يحملو اباءهم الختيارية... الامهات تحمل ابناءها..
كل واحد غالي يحمل الغالي على كلبو... حسينا بانه كل شي بكلبنا ظاع..
حسينا كل اشي بيموت كدام عينينا.. حتى شجر الزيتون...
حسيناه بيبيكي لانه راح نتركو.. والتينة حسيتها بتكول..
لا لا لا خدوني معكم.. بس هي كانت اكوى منا..
هي بكيت بالارظ لو على موتها.. احنا هربنا من الموت.. هربنا...من الموت وتركنا الحياة ورانا

طبيبه مسلمه

08-22-2005, 03:38 PM

أختى همسه 1004ما شاءالله عليك

أبدعتى فى تصوير الرحيل والله كلبى (قلبى ) تكطع وحسيت روحى ابتطلع منى

كمة الروعه فىنكل الصوره المأساويه خليتينى أحس انى معهم 1006

وكيف احساس الواحد بيكون لما يفقد كل اشى ولما يبعد عن روحه ووطنه

جد كلبى(قلبى) وجعنىىىىىىى

الله يعينهااااااا ستى ام أحمد ويعين شعبناااااا على مأساته

وهينااا أختى همسه ابنستى انشوف شو بيصير كمان1007

وعينااا ابتدمع والكلب(القلب) حزين1006

تسلمىىىىى همسه1015

ربنااااا يسعدك

همسة

08-25-2005, 12:15 AM

بسم الله الرحمن الرحيم
اختي طبيبة مسلمة
كل تحيتي لتواجدك الرائع في زوايا القلب الحانية
تواجدي بين صفحات الالم في الرحيل والذهاب حيث المجهول القاتل في زوايا وطننا المهجور..
وكل محبتي لك
اختك

المقاومه

08-25-2005, 03:39 PM

حكايا ريفيه جميله هل هذه من نسيج جيالك اخت همسه ام منقوله

almajd

08-26-2005, 12:12 AM

اجمل ما في هذه السيره الذهبيه لستنا ام احمد انها باللغة خاصه مميزه وللهجهة مميزه ايضا.
سييرة ام احمد وان اختلف الاسم تحافظ على تراثنا وعلى لهجاتنا الاصيله.
ما زلت انتظر همسه ان تكملي لنا سيرة ام احمد

همسة

08-27-2005, 07:17 PM

بسم الله الرحمن الرحيم

المقاومة
ان حكايا ام احمد ليست سوى من صنع القدر هي حكايا ويوميات والدي ووالدتك وجدي وجدتك والجارة والجار.. هي حكايا اللجوء الشعب الفلسطيني وكيف كان يعيش بهدوء وأمان إلى أن تدخلت يد الصهيون النجسة.. فأفسدت الهناء ومنحت الدمعة في كل بيت..
ولكني قمت بصياغتها باللهجة العامية.. لسبب بسيط جدا انك تستمع لصوت ام احمد المرأة البسيطة التي لا تعرف كيف تكتب اسمها، فكيف ستتحدث اليكم ام احمد بالفصحى؟؟

المجد
ستستمر ام احمد في سرد حكاياها،، عل الكلام.. يشفي الالام..

كل محبتي لتواجدكما

اختكما

همسة

08-27-2005, 07:50 PM

بسم الله الرحمن الرحيم
ركبنا على الدابة تبعتنا، والناس بتلملم بخلكاتها، وباواعيها، ومشينا ايام وليالي وحركتنا الشمس، ما همنا، عطشنا، بدنا نعيش، كانت حماتي بمليون زلمة، بتكاتل على اللكمة وبتبعبش على الزرعة، عشان الاولاد ياكلو، لو شفتو حالنا، تصعب علينا ارظنا ودورنا، صح كنا عايشين مستورين الحال، بس ما في اصعب من الغربة، ما في اصعب من انك تنطرد من كريتك ومن بيتك.

وصلنا لحدود غزة، كنت كتير اسمع عن برتكان غزة، وكتير كنت اسمع عن البحر تبعها، كان نفسي اجي عليها بس مش اجي وانا خايفة ومطرودة حسبي الله ونعم الوكيل.

كانت غزة بهديك الايام تحت الحكومة المصرية، كتر الله خيرهم اهل غزة، راعونا واعطونا اكل ومي للاولاد، وسمعنا انه في منظمة امريكية ( راس الحية ) كال بتكدم مساعدات للاجئين لوين صار اسمنا لاجئين هيك وصلتنا اليهود كال بتكدم مساعدات اعطونا خيمة كوية، نصبناها بمنطكة كريبة من غزة احنا كنا بدنا نكون كراب كتير من خط الهدنة عشان وكتيش تيجي النا فرصة للرجوع نرجع، سمو مخيمنا ( مخيم جباليا )...

كانت غزة عاملة مثل علبة سردين لكثر الناس الي هربت من كراها واجت هنا، يمكن تلاكي الامان.. يمكن تحس بشوية من الاستكرار...

لكن لما اجى الشتا مطرت الدنيا كتير هذيك السنة، وطارت الخيام ورجعنا مرة تانية تحت رحمة البرد والرياح والمطر.. بنو النا شوية حيطان وهيك صرنا من هالسكان، لكن لا دار ولا مال، ولا رجال..

شباب كثير وناس كثير هربت للبنان، ولسوريا وللاردن، ما كبلنا نترك هالبلاد،، غزة غزة ولا نطلع من هالبكعة، بدنا نكون كريبين من كريتنا، عشان نرجع الها في يوم من الايام.. لو ربنا كتب النا طول العمر..

بالمخيم، كل واحد لما كان يحكي اسمو كان يحكي اسم كريتو الي تركها، ولما يكولك اسم الكرية تلاكي الدمعة غرغرت في عينيه، وكأنه في اشي بيشدو لهناك، يا ويلنا ويا حسرة كلوبنا على هالدار، يا حسرة كلوبنا.. لما تموت الفرحة بكلوبنا وما يبكي غير الالم وغير ذكريات الماضي، بطلنا نسمع صوت الصبايا يزغردن ولا صوت الرجال ينشدو وبطلنا نسمع ضحكة اولادنا.. يا رب حتى الضحكى ماتت في كلوب الصغار..

واكثر شي كان حارك كلبي انا ومرت عمي ( أبو احمد ) يلي انكطعت اخبارو، وبطلنا نسمع اشي عنو، وبطلنا نعرف اشي، يا ويلي كيف بدو يعرف انا هربنا لغزة، والله ما بعرف ايش بدو يكول، يا ناس لسة عايش، يا ناس ما صارلو اشي، ما حبسو، معكول يعدموه زي محمد جمجوم وفؤاد حجازي.؟؟ افكار وهواجس.. بالليل لما كنا نام، انا ومرت عمي على مخدة واحدة نرجع بالكلام لما كنا ناكل المفتول اخر مرة، كنا حاسين بهيك انا وهي وحتى ابو احمد، كان يومها، متل نودع لمتنا وجمعتنا..

مرة سمعت الناس تكول انه عدد الكرى الي الناس تركتها 530 كرية وكبيلة ومدينة، وكتير ناس تركت عشان الذبح الي صار في دير ياسين، وكتير ناس كانت زي الجواسيس تكول للناس انه الفدائية استستلمو وانه العرب باعوها، ذبحولنا نفسيتنا كبل ليذبحولنا اولادنا..

شوارع المخيم للي ما بيعرفها كتير ديكة، المجاري الله يعزكم بتمشي فيها، لو حكى الجار مع مرتو كلمة الجار الي جنبو بيسمعها، ما في شغل، ما في مدارس لحد هلكيت، كان بس لازم تستنى لما يجيلك موظف الوكالة يعطيك المؤن، واعطونا بطاكة التموين.. ويا حسرة كلبي على بطاكة التموين...

http://www.pvda.be/images/solidair2003/sol2703/p02tentschool1948.jpg

http://www.scoop.co.nz/stories/images/0503/2a918e71b38a9203c76a.jpeg

http://www.fracturednews.com/FN-images/Tell-Tale/11-03-refugees1948-SM.jpg

http://www.telegraph.co.uk/news/graphics/campaigns/middle_east/xmidhomeref.jpg

http://www.kinghussein.gov.jo/images/jo_palestine2.jpg

طبيبه مسلمه

08-30-2005, 11:15 PM

أهلا أختى همسه1014 يعطيك العافيه

مش عارفه شو احكى او اعلك(اعلق) من كتر حجم مأساة شعبى وألمه

فى هاى الظرووف الصعبه 1006

الكلام يعجز عن الوصف والتعبير

ولكن الصوره وحدهااااااااا من تعبر وتحكىىىىى

وربنااااا يعين شعبناااا وين مكان1030

تسلمىىىىى همسه1004

احنااااااااااا معك هينااااااا بنتابع وبنشووف وبنتألم لجرح شعبنااااااااالنازف

وربناااااااا على الظالم1030

همسة

09-02-2005, 09:03 PM

بسم الله الرحمن الرحيم

اختي طبيبة مسلمة

لا اعرف ماذا اقول فسحر تواجدك يغطي على كل تعبير يمكنني قوله

كل محبتي

اختك

همسة

09-02-2005, 09:27 PM

بسم الله الرحمن الرحيم

ظلينا بمخيم جباليا سنين وسنين.. وصار عمر احمد فيها 10 سنين، كنت بهديك الفترة بشتغل بالتطريز، وكانت حماتي كتير صارت ختيارة، انا كنت اطرز وابيع، ومن التطريز كنا ناكل رزكاتنا، احمد ما شاء الله حوله وحواليه كان يروح عالمدرسة الي فتحتها الوكالة، ويروح عالطعمة كل يوم الصبح وياخد محمد ونور ويطعميهم، عشان نوفر شوية مصاري. وباللي بيطلع الي من ورا التطريز كنت ازبط الكرميد تبع الدار الصغيرة الي بنتها الوكالة، كانت الدار غرفتين وحمام الله يعزكم.. وممر ديك..

كديش اشتكت لابو احمد؟؟ كديش صار نفسي اشوفو هلكيت هلكيت.. وانا كاعدة بطرز وماسكة هالخيط.. سرحت بخيالي لايام الكرية، وكديش كنا مبسوطين، مشتاكة اني ازرع تينة، ما كسلت جبت تينة وغرستها على باب الدار، هيها بتزكرنا بكريتنا.. عالاكل.. وفي يوم اجاني احمد وكالي..
- يما انا مشتاك لكريتنا.
- بنرجع الها يما بنرجع الها بس انت كول ان شاء الله.
- يما وكتيش بدنا نشوف ابويا؟
- كول ان شاء الله يما كول ان شاء الله.

سمعت صوت حماتي تكول..
ظاعت يا هالعرب كريتنا..
وظاعت معها كرامتنا..
بدي ابوس ترابها..
وبعدها طخوني مية..

وسمعت صوتها وهي بتبكي.. وبتبكي بحركة كمان، كمت الها، وحظنتها، وصرت انا وهي نبكي ونبكي..
ابو احمد.. يا نور العين، اشتكنا الك، تعال يمكن تمحي شوية من هالوجع..

صار احمد يبكي معنا ويكول لستو
- خلص يا ستي خلص امانة، راح ارجعها راح ارجعها، راح اطخ كل اليهود وارجعها..

وفي أول يوم بشهر رمضان.. حطينا الفطور عشان نفطر.. ويظرب المدفع.. على الله أكبر... ويدك الباب.. وكان متخفي ورا الباب...

صرخت من الفرحة .. وكعت من ايدي الصينية
- مرت عمي.. يا مرت عمي تعالي شوفي مين عنا؟؟؟؟
اجت مرت عمي تركظ ركظ.. كان نظرها مسكينة صار ظعيف.. هذا ابني ابو احمد...
حضنتو
وهو كمان حضنها.. بس شو انا شايفة؟؟
ما صدكت عيوني!!
ابو احمد؟؟؟ ابو احمد.. انا رميت حالي عليه وملت دموعي كميصو.. وكالي معلش يا صفية
رجعت الك من غير ايد؟؟ معلش يا صفية... كلت له كلنا للوطن فدوة..
ومسكتو من ثوبو وسحبتو لحد الفطور، وكعدنا نفطر.. وصار يحكي ايش كانو الفدائية يعملو باليهود الملاعيين.. والله ما سمعنا غير عكس هالكلام بالظبط.. مش هيك كنا نسمع يا ابو احمد..
كنا نسمع انهم يكتلوكو ويحبسوكو..
- مزبوط يا صفية، انا ما كدرو يمسكوني او يعتكلوني.. كل الشباب الي معي.. استشهدوا معظمهم، والباكي انحبس ظليت انا ومعلم المدرسة الي كان بالكرية، واكمن شاب من اهل كريتنا، نعمل كمائن الهم ونصيدهم, وفي هديك الليلة الغبرة.. من لما انتو طلعتو من الكرية.. كانو مخططين الملاعيين انهم يعملو مذبحة نفس تبعت دير ياسين. كلنا راح نخليكو تطلعو بأمان وبسلامة من الله، رحنا عطلناهم ومركت الدبابات على اجسامنا، ربنا ما كتب الي الشهادة، انكطعت ايدي، واعتكلوني، وهيني اجيت بعد سجن سبع سنين..
- ما كنت بتكدر تبعت النا انك لسة عايش والله ما عرفنا انت بالسما ولا بالارظ؟
- يا ريت بالارظ يا صفية يا ريت بالارظ؟؟ كل اشي يهون عن الذل بالسجن، بالسجن هناك يا صفية والكلام للحاجة كمان، انهم بيكتلو الانسان الي عايش فينا، بيعاملونا مثل البهايم والحيوانات،،،
- يا ويلي عليك يما يا ويلي عليك المهم الحمد لله على سلامتك..
- اه يما صحيح وين الاولاد احمد ومحمد ونور؟
- بالجامع يما بالجامع؟
- ليش بالجامع؟
- عاملين اهل الخير فطور للناس، وراحو اولادك يفطرو هناك؟
- اكيد هلكيت احمد كبر؟
- كبر وصار رجال يما صار رجال... المهم انت الحمد لله على سلامتك

http://www.smh.com.au/ffxImage/urlpicture_id_1060145759766_2003/08/07/rhs_palestine.jpg

طبيبه مسلمه

09-04-2005, 09:28 AM

أهلا همسه0036

يعطيك العافيه

على كد ما كانت ستى أم أحمد تتألم وتتحسر على غيبة أبو أحمد

على كد ما طرت 00113 من الفرحه وانبسطت لما رجع أبو أحمد لستى

الله 00000000 ما أحلالاهاااااااااعودة الغايب1007

كديش فرحت لعودته أبو أحمد والله كاءنى شايفتها ستى أم أحمد

وكاءنى معهاااااااا فى هاى الوكت

ربناااااااا يرجع كل غايب لأهله يا رب1030

تسلمى همسه

كديش انبسطتنااااااااا بالحلكه1001

يعطيك العافيه

ما تتأخرىى علينااااااااااااا هينا ابنستنىى بس مش مع كاسة الشاى

مع النسكافيه 1011

همسة

09-11-2005, 03:35 PM

بسم الله الرحمن الرحيم

طبيبة مسلمة

صحة وهنا على كلبك النفساكيه.. يا رب تتهني فيه ( يختي هاظا بينشرب ولا بينكرش كرش ) يكصفش عمرك ايش دمك خفيف ولزيزة.

الله يسلمك يا رب ويهنيكي وما يبعد حبايبك عنك. والله انه البعد نار، والغربة نار، والحرب نار يكويهم الله بنارها الي بيكيدوها..

وهيو الله سترها مع ابو احمد، صح ضحى بإيدو، بس غيرنا ضحى بأكثر من هيك..

كل محبتي الك وتابعينا

اختك

همسة

09-11-2005, 04:15 PM

بسم الله الرحمن الرحيم

بعد المغرب.. وصلى فينا ابو احمد صلاة المغرب جماعة، وبعدها ضبيت المواعين عشان اجليهم، كان البيت كتير دييك. ابو احمد صار يمشي فيه ويكول كيف متحملة يا صفية؟ كلت له احسن من الخيمة، واحسن من السجن الي كنت فيه، الله يصبرنا على فراق ديارنا رد علي وكالي الله يصبرنا

صحيح انا كنت فرحانة بانه رجع النا، بس حاسة انه فرحتنا ناكصة، لا لا تفكروني عشان حكاية ايدو لا والله، بس رجعت ابو احمد ما كانت كاملة عشان ما رجعنا على دارنا، كديش مشتاكة الها، لما بحن الها بحط حالي بهالاوضة وبصير ابكي، يا ويلي كديش الواحد بيرتبط بالارظ؟ كيف لأ وهو اصلا مخلوك منها وراح يرجع الها..

ابو احمد عجبتو التطريزة الي عملتها وحطيتها على الحيطة، كالي صايرة بتعرفي تطرزي يا صفية؟؟

كلت اله البركة في امك علمتني عشان نكدر ناكل ونشرب وما نعوز حدا

- الله يخليها النا بركتنا يا رب..
اطلعت فينا حماتي من تحت حرامها وصارت تظحك بصوت مكتوم كأنه بدها تشوفنا شو بدنا نحكي عنها بغيابها بس انا سمعت صوت ضحكتها الصغيرة...

مسكني ابو احمد من كتافي.. وكالي والله اشتكت الك يا صفية، كان نفسي كديش اني احافظ عليكم وما اخليكم تتركو كريتنا، هادي تبعتنا يا صفية كيف نطلع منها..
كلت اله ولا انا كنت بدي، بس امك كالت عشان نرجعها لازم نتركها، لو كتلونا مش راح نعرف نرجع وهي خافت يصير اشي للاولاد.. وكان معها حك، كانو الهمج بيكتلو اي حدا.

ومرة واحدة فتح الباب وخش علينا احمد ما شاء الله عليه الله يباركلي فيه جايب الي تمر ولبن من الجامع..

- يما يما،،، تعالي شوفي ايش جبت الك... جبت الك لبن وتمر ووقع اللبن من ايده لما شاف ابوه وكال وهو مستغرب..
- يما؟ مين هظا، بعرف ما حدا بيخش علينا من الرجال.. يما؟ عشان انتي خششتيه هنا؟ اكيد هاظا ابويا
بالزبط زي ما انتي كلتي النا عنه.. والله يا جماعة الخير انا ما كدرت احكي صرت ارجف وابكي،، الدم بيحن يا اخوانا، الولد عرف ابوه من غير ليشوفو من زماااااااان ولا يتزكر منه اشي ورمه حالو عليه وصار يبكي يبكي

نور كمان ومحمد حضنوا ابوهم وصارو يبكو كتير.. كالت نور يا حاج من ايش ايدك هادي؟ كال الها انا مش حاج انا ابوكي يا نور انا ابوكي.. ايدي هادي كطعوها اليهود يابا
- ليش كطعوها؟
- عشان ما اكتلهم؟
- وليش تكتلهم؟
- عشان سركو كريتنا
- لازم تكتلهم عشان ترجعها؟
- لازم يابا يا نور لازم..

وسهرنا هديك الليلة مع سوا.. زي زمان، بس كانت ببيت صغير بمخيم جباليا، واحنا كنا زمان نكعد ببيتنا الي ترمح فيه الخيال.. كان بيتنا كبير، ومليان شجر، وهنا كلنا فرحانين على شجرة التين.. يلا اللي من الله يا ما احلاه.. تزكرنا اخر ليلة لما اكلنا مفتول، ولما سهرنا سوا...

ليلتها نامت حماتي عالبدري، ونيمت الاولاد وكعدت احكي انا وياه، وتزكرنا كل اشي بالكرية، وتزكرنا المختار، والحكلة.. نزلت دموعو على خدو.. مسحت دمعتو وكلت اله ان شاء الله بترجع ان شاء الله، كالي

- بدنا نرجع يا صفية نزرع من أول وجديد انا بعرفش اعمل اشي غير الفلاحة..
- فتش على حدا غزة مليانة ارظ ومليانة زراعة واشتغل عندو معلش بالاكرة بالاكرة المهم تعمل الاشي الي بتحبو

وصار الكلام انه بدو يشوف حدا يصير يزرع عندو

اميرة الشجون

09-13-2005, 03:43 AM

ما شاءلله اختي همسه,
عندما اقرأ كلماتك يشدني الحنين ان اكون هناك,
مع ام احمد والماضي والجميل,
لك تحياتي

همسة

09-14-2005, 12:39 AM

بسم الله الرحمن الرحيم

اميرة الشجون

بيشرفني انك اجيتي هنا، باكة ورد من كلبي الك يا كمر

ام احمد

طبيبه مسلمه

09-14-2005, 12:58 AM

أهلا همسه 0036 حياك الله

تسلمى هاى نسكافيه ابتنشرب1011 كلنااااااا نتركى اشوى

بس ابتعرفى كاسة الشاى مع ميرمية ابلادنااااا أزكىى بكتير1008

المهم الحمدلله على سلامته ابو أحمد وربناااا يهنيهاا فيه ستى ام أحمد

يا سلام ما أحلىى لم الشمل والعيله مع بعض 1007

والأحلىى الذكريات نتذكرهاااااااا ونعيش صورتها وريحتهااا1010

تسلمىىىىى يا همسه

يعطيك العافيه1030

وهيناااااااااا كمان ابنستنىىىى مع كاسة الشاى بمريمية ابلادنااا الزاكيه44445

همسة

09-14-2005, 10:17 PM

بسم الله الرحمن الرحيم

يفرحني جدا تواجدك الدائم المعطر

نفسكايه ايه يما

بكولك هو في احلى من الكهوة السادة مع كبشة التمر؟؟

كل محبتي لتواجدك العطر

اختك

طبيبه مسلمه

09-15-2005, 01:31 AM

هلا همسه0036

كلامك صح شو هاىىىىى النسكافيه1011 من وين احنااااا ابنعرفهااااااا

كهوة بلادناااااااااااااااااااا أزكى بكتير مع كبشة التمر1007

صحتين 1001 على قلبك اختىىىى همسه

almajd

09-15-2005, 06:37 PM

همسه ارى سيرة الحاجه وصلت الى وضع قريب وانا انتظر عندما تصل لمرحلة ان تقول عن حرف السين ثين
بانتظار المزيد

همسة

09-16-2005, 11:43 PM

بسم الله الرحمن الرحيم

اختي الجميلة طبيبة مسلمة
هي نفحات من عبق الليل الطويل المؤلم والحلم بالامل القريب وعودة مزلزلة
وحين تتلاشى الاحلام
نبدأ نقنع انفسنا بجمال الواقع

اخي المجد
تواجدك رائع في صفحتي
هي حكاية، فقط حكاية من حكايات الوطن المؤلمة
من تاريخ كامل بالمعاناة
من صفحات كتبت بالدم وسطرت بالتضحيات
هو جزء منا
فبدونه يبتر ماضينا

كل محبتي
اختكما

همسة

09-17-2005, 12:00 AM

بسم الله الرحمن الرحيم

فتش ابو احمد عن حدا يشغلو.. بس عشان ايدو مكطوعة ما كانو بيشغلوه بيكولو كيف بدو يمسك الفاسة أي والله ما هي صعبة ابو احمد جدع ومدرب حالو على مسكتها مليح.. مليح.. لغاية معطف عليه رجال كان عندو ارظ كتير بغزة، وكالو بدي اجربك لاخر النهار، لو ما طلعت منيح انا بدي اسامحك واعطيك اجرة اليوم، وبعدها الله يسهل عليك.. ويرزكك بس لو كنت منيح، راح اخليك تشتغل عندي لاخر يوم بعمرك..

والله فرح كتير وكالو ان شاء الله بس انت جرب وشوف ولا تستحي تحكي الصحيح، مش عشان ايدي مكطوعة تعطف علي وتشفك. رد الزلمة الايدمي وكال، له يا زلمة انت بطل مش عشان كصة ايدك بس مش معنى ايدك مكطوعة انك ما تشتغل ولا تسحب حالك وتكعد على باب الجامع تشحت، انا احترمت فيك انك بتفتش عن شغلانتك الاصلية وانك مكرر انك تعتمد على نفسك.. لما عاد الي ابو احمد كلام الزلمة الايدمي ما عرفت ايش يعني تعتمد على نفسك.. فكرت كتير ما كبل هالمخ يستوعبها، ايش يعني يستوعبها كمان ما عرفت بس هو ابو احمد كالي لما انا ما فهمت انتي بتستوعبيش، وعملت حالي فهمتها عشان لو سألتو ايش يعني بستوعبش، راح يكولي انتي فعلا بتستوعبيش لانك ما فهمتي تعتمد على نفسك كمان مش فاهمة تستوعبيش فكلت بستوعبش بستوعبش احسن من اشي تاني يمكن تكون كلمة خير!!!

والله جهزت الو السرحة وسحب حالو وراح، لكى الزلمة مجهز الو الاغراض الي محتاجها، وصار يوديه بالسيارة تبعتو على البيارة الي كانت عندو ويرجعو كل يوم، وكان يرجع معو فواكه وبرتكان وبلنسيا وفرنساوي وكتير حاجات زاكية.. الاولاد كمان اتعلكو بابوهم كتير، وكانت الست نور تعمل فيها ضرة الي ما تحب غير تنام بحضنو.. وتصير تعيط عشان يراظيها، اما احمد الله يرضى عليه يا رب، أخذها الاول على الصف كله، ووزعت على كل اولاد المخيم حامض حلو، كنت محوشة حكو، يما عليه شهادتو بتفرح الكلب مع اني ما عرفت اكراها بس فهمني ابو احمد انه كان من المتفوكين.. ربنا يحفظه ويخليه الي.. ومحمد نور عيني كمان كان شاطر.
الزلمة الايدمي الي اشتغل عندو ابو احمد كان كتير مبسوط منه، وكان دايما يجي يسهر عنا، ويكول يا جماعة الخير انا لما بشفوكو بتزكر الكرى الي دمرها الاحتلال، وبحن الها، مين الاحتلال هدول؟؟ يمكن الناس الي ساعدو اليهود عشان يسركو كريتنا، كالي ابو احمد اسكتي فظحتينا، الاحتلال هم اساسا اليهو، انخرست بلاش اخبص اكتر و اكتر....

وحماتي ردت فيها الروح مع رجعة ابو احمد النا، لحد مكررت انها تحج هالسنة. استغربت انا، عمرها ما فكرت تروح عالحج، والحج لازمه مصاريف، واتاريها معها مصاري، وما كبلت تكول النا من وين جابتهم، بس كالت النا، من باب الله!!

بعد كم سنة، ابو احمد كدر يحوش مبلغ من المصاري، وانا كنت اشتغل بالتطريز، ومرت عمي فتحت دكانة صغيرة عنا بالدار، وكدرنا احنا التلاتة نحوش مبلغ صغير، وكانت مفاجأة حلوة لما خش ابو احمد مرة وكالي:
- صفية هاتي المصريات اللي معاكي.
- ليش؟ بدك تشتري دهب؟
- دهب ايش يا ولية؟ بس هاتي المصاري
- اعطيته المصاري وصارت يعد بالمصاري الي معو، كالي انا معي 10 ليرات، امي معها 5 ليرات، وانتي معك 5 ليرات يبكى ضايل 10 ليرات.
- عشر ليرات لايش؟ بقدر انا اتداينهم من جارتنا ام خالد، هي مرة ختيارة ومكطوعة من سجرة وبتعتبرني بنتها بعد مـ انكتل كل اولادها وبناتها بايام البلاد. وبتعطيني اياهم وبنرجعهم الها.
رحت جبت المصاري ورجعت بسرعة.
- خلص يا صفية راح نرجع نشتغل فلاحين بارضنا مش عند حدا من الناس. اليوم شفت كطعة ارض غير شكل صح بعيدة بس راح تكون ملك النا.
- يعني راح نصير نزرع ونكلع ونحصد زي زمان.؟
- زي زمان يا صفية زي زمان. يا رب كديش فرحت.. ما احلاها.. نرجع نحصد ونزرع، وناكل من ارظنا.. يا رب يا رب يا ابو احمد يا رب.
- ومرت عمي مسكت عصاتها الحاجة مرت عمي كصدي كانت بتزعل لو ما كلنا الها حاجة اجت بعكازتها وكالت..
- يما يا ابو احمد، صح انت بدك تشتري ارظ الك لكن لا تنسى ارض كريتنا عشان ان ما رجعناها،، ضاعت علينا

وكعت من طولها.. وسلمت روحها للخالق..

طبيبه مسلمه

09-22-2005, 02:20 AM

أهلا همسه0036 كيفك

ان شاءالله بخير وعافيه1007

ما شاءالله عليه ابو أحمد انسان ارادته كويه وعزمه حديد

ومبارك عليه الارض الجديده00113

ما فى أحلى من انه الواحد يشتغل بأرضه وماله

أسعدتيناااا همسه1004

وهياتناااااااا كمان ابنسسسسستنى مع فنجان الكهوة والتمرة الزاكيه1011

همسة

09-25-2005, 01:39 PM

بسم الله الرحمن الرحيم

اختي طبيبة مسلمة

حياك الله على متابعتك الرائعة، ورونق تواجد اسمك من بين الكلمات المسطورة هنا

تابعينا

كل محبتي

اختك

همسة

09-25-2005, 05:36 PM

بسم الله الرحمن الرحيم

لما توفت مرت عمي الله يرحمها ويغفر الها ويحسن الها حسيت انه الظار فظيت علي
صرت احس حالي كتير مخنوكة، كانت والله شايلة عني حمل كبير، وكدرت تخليني رغم كسوتها احبها
لانها كانت دايما على حك، وكانت صاحبة كلمة وهيبة.

ابو احمد كتير كمان أثر عليه موت امه، صح كان هو يتماسك، ويكول ( هاظي ارادة ربنا، والي كاتبو ربنا لازم يصير ) بس كمان كنت احس انه بيكابر وبيتصرف عكس الي في كلبو.

ومرت السنين والسنين والسنين

ما بعرف كديش مر سنين، بس ما شاء الله حول احمد وحواليه صار رجال كبير، وخلص المدرسة الثانوية تبعتو، كان يروح لغزة عشان يتعلم هناك، وكان الو شخصية شبه ابوه الخالك الناطك. وصار بدو يتعلم بالجامعة، وايش هادي الجامعة سألتو؟
- هاظي يما مدرسة كبيرة، فيها ناس من كل البلدان بيتعلمو وبعدها بصيرو موظفين.
- يعني زي معلم المدرسة؟
- بالزبط يما زي معلم المدرسة ومعلمة المدرسة الي كانت بكريتكم.
- والله يما كنت احبها كتير.
- ايش كولك يما بدي اروح اتعلم بمصر.
- تتعلم وين؟ ليش يما؟
- بدي اخش كلية حربية يما بمصر، وارجع عشان اكاتل اليهود.
- لا يما بديش تتعلم بمصر انا. بعدين المعلمين بيكاتلوش اليهود.
- يما انا بدي اتعلم شغلة تانية، بدي اصير ظابط.
- فش سفر يعني فش سفر.

مش عارفة ليش خفت، ابني بدو يصير ظابط ويرجع يكاتل اليهود، انا صحيح علمتو على انه يكون رجال يكاتل، بس انه يبعد عني ويكاتل اليهود؟ لأ يعني لأ.

- يما الله يرضى عليكي، والله انا بحلم فيها حلم اني اتعلم واصير ظابط.
- يما والله ما بكدر على فراكك انت نور عيني يما يا احمد.
- الله يرضى عليكي يما، والله وانتي حبيبتي من جوة. بعدين ايش بدك باحمد اذا كان ابو احمد معاكي، هو نور عينيكي.
- لا تاخدني بدوكة، مش راح تسافر يعني مش راح تسافر.
بالمسا لما رجع ابو احمد، وبعد العشا انا واحمد ومحمد ونور ونضال ( هاظا خلفتو بعد نور اخر العنكود بس كان مدلع كتير ومايص )، فتحت الموظوع مع ابو احمد.
- شايف يا ابو احمد ابنك بدو يتركنا ويسافر على مصر يتعلم.
- مرحبابو ايش بدك تتعلم هناك يابا يا احمد؟
- بدي اتعلم بالكلية الحربية، عشان اصير ظابط.
ضحك ابو احمد وانبسط وخبط ابنه بظهرو وهو يمزح معه وكالو
- الله يخليك الي يا احمد، الله يرظى عليك يابا تروح وتيجي بالسلامة وانا مستعد من كرش لعشرة، بكرة ببيع الك تنكتين زيت عشان اعطيك حكهم.
- اتفكت انت وابنك علي؟ يعني انا افكع راسي بالحيط فش حدا بدو يكولي ايش بتعملي؟
- ايش الي بدك اياه يا صفية؟
- ابني يظل عندي كدام عيني وبحظني.
- ابنك رايح يتعلم يا صفية، وبعرفك ما بتكولي لأ للتعليم.
- بس مش بالحرب يا ابو احمد
ظحك ابو احمد كتير كتير كتير وكال
- اسمها حربية يا ام احمد.
- طيب بالحربية ولا البحرية، ابنك بدو يتكاتل مع اليهود
- ويكتلهم ويموت وين المشكلة؟
- بدك ابني يموت؟
- لأ بدي اياه كيف يكون زلمة.
- يعني لازم يموت عشان يكون زلمة؟
- لأ لازم يدافع عن ارظو ووطنو وعرضو يا صفية.
- مهو مهو مهو
- مالك يا صفية بتأتئي مش عارفة تكولي انك كمان بدك اياه يحارب اليهود؟
- بدي والله العظيم بدي، خلص يما يا احمد وكتيش بدك تسافر؟
- بعد اسبوع ان شاء الله يما.
- هيك بسرعة يما؟
- يلا ادوبك تجهزيلي اكمن شغلة اوخذها معي.

رحت على اوضتي وصرت اعيط ، اعيط، شكلي مش راح اشوف ابني مرة ثانية يا ناس

همسة

10-24-2005, 01:52 AM

بسم الله الرحمن الرحيم

وغاب الولد أيام، وشهور وغاب سنة، وسمعت انه راجع هو والفركة تبعتو
وفرحت يما كثير لما رجع من هناك، كنت خايفة عليه يصير ظابط، بعدها يصير يكاتل في اليهود، وانا أحمد غالي في كلبي كتير، وربنا ما يحرم حبيب من حبيبه.
ورجع على جباليا، ويما ما احلى طلته بالبلدة الميري.. كنت ابوسه من صدرو ومن كتفو، مع اني لازم اكف على طراطيش اصابيعي عشان اصل لكتفو، كان الله يرظى عليه، طويل كتير، كنت لازم اكف على طراطيش اصابيعي عشان اوصل اله.. ولما اوصل اله.. ابوسو من كتفو
وكانت النجوم مزينة كتفو ومن تحت ركبتو الله يخليه، والله يا جماعة ندمت على اني كنت بدي احرمو انه يروح على مصر يتعلم، كانت البدلة لايكة عليه، ويسعدو الله بيشرف اهلو وبيرفع راسهم.
طمّل على ايدي وكبّلها، وكالي إرظي علي يما، كلت له مرظي عليك دايما يما، كالي بالله يما لا تزعلي عشان رحت على مصر وانت غظبانة، كلت له والله يما كلب الام ما بيكدر يحكد، ولا يجحد الله يسامحك ويرظى عنك.
وكنت فرحانة فيه كتير، ما كانت واسعاني الفرحة.
ويوم صحيت اصلي الفجر، لكيت أحمد ماسك المصحف وبيكرأ قرآن، استغربت
- يما يا أحمد لسة انت صاحي؟
- ما اجاني نوم يما، سمعنا أنه اسرائيل بدها تيجي تحتل غزة.
- ونهرب؟
- ما في هروب يما زي زمان، زمان كان عنا غزة والظفة هربنا الهم وهلكيت؟ يبلعنا البحر، والله ما بنطلع ولا بنتزحزح عن ترابنا.
صحي أبو أحمد من النوم يصلي الفجر، وصلينا احنا الثلاثة جماعة بعدها لكيت أحمد بيبكي وبيكول.
- نفسي يما اشوف كريتنا.
صرخت بصوت عالي وكلت
- آآآآه يما يا احمد ما احلى كريتنا ولا حياة كريتنا.
- طيب يابا أنا طالع هلكيت على الشغل في المنطار.
- ايش هدا المنطار؟
كالي ابو احمد:
- هدا جبل في شرك غزة، بيتدرب فيه أحمد واصحابو هناك.
نكز كلبي لما سمعت.. وصرخت وكلت.. لأ أنا ما بدي تروح تتدرب على اشي، لسة ما صار الك كتير بتكول انه اسرائيل يمكن تيجي على غزة، ما بدي يجو وانت بعيد عني واظل كلكانة عليك.
- يما ان شاء الله ما بيجو، انا بس بحكي هيك عشان انا حاسس هيك، لكن بالواكع ما في اشي صار من هالكلام.
- يما بالله عليك لا تعرّض حياتك للخطر، والله احنا محتاجينك وعايزينك.
- ما في واحد بيصيبو اكتر من قدرو، والي مكتوب على الجبين لازم تشوفو العين.
- يما لا تفوّل على حالك.
- لو استشهدت يما، احلّفك بالله العظيم لا تصرخي، ولا تشكي ثوبك، ولا تصوتي، بالله عليكي يما، زغرتي وكولي الحمد لله الي شرّفني ربي باستشهاده.
- لا يما يا حبيبي لا تكول هيك، هظا فال مش نافع.
حظنتو،،، بس والله كلبي مكبوظ يا جماعة مكبوظ..

راح احمد ربي يسهل عليه..
وسمعت صوت الطيارات ترمي حاجات وصوتها كان يسكر الشبابيك تبعت الناس، بس ما عرفت ايش بيصير، والله خفت يا جماعة، كلبي هيك دك دكة كوية حسيت حالي بدي اموت من الخوف، وصرخت
---- أحمد يماااااااااااااااا

almajd

10-24-2005, 02:51 AM

ماشاءلله يا همسه كبر الولد وصار بدو يكاتل اليهود يبدو ان قتال اليهود اصبح امرا فطريا
في انتظار المزيد من سلسلة ام احمد.

em-adnan

10-24-2005, 03:02 AM

احمد يما الله يحميك ويرجعك لامك

وبعدين يا همسه لا تتاخرى علينا

بدنا نعرف شو صار

همسة

10-24-2005, 02:52 PM

بسم الله الرحمن الرحيم

اخي المجد ما هو قادم اصعب كثيرا مما مر

بالماضي ضاعت الارض وتاهت الناس بين الحاجة والاولاد

والآن تفقد الام ما كانت تعقد عليها املا وما بنت عليه مستقبلا

ويتيه المستقبل والماضي والحاضر من بين يديها..

تابعنا فالقصة جدا مؤثرة وحزينة.

كل محبتي لتركك و ردة في زهريتي.

اختك

همسة

10-24-2005, 02:53 PM

بسم الله الرحمن الرحيم

اختي ام عدنان

تابعي معاناة الام الفلسطينية

وردة لتواجدك

اختك

صمود

10-24-2005, 05:39 PM

غاليتي همسة
لقد حملنا قلمك المبدع وسافر بنا الى احبة لم نلتق بهم ولكننا احبناهم والى اهل لم نعرفهم ولكنهم هم هويتنا وحط رحاله في بيت من بيوتهم لنشاركهم فرحهم وحزنهم وآهاتهم ونسمع ضحكاتهم القليلة وتلتقي دموعنا بدموعهم
لم ارى ام احمد ولكنها تعيش في مخيلتي امراة قوية بصمودها رقيقة بحنانها
نشكر لك هذه الرحلة الممتعة ونحن ننتظر بشوق لما يجود به علينا قلمك
وتقبلي منة همسة دافئة

همسة

10-24-2005, 09:49 PM

بسم الله الرحمن الرحيم

اختي صمود

ام احمد جسر بيننا وبين الماضي، بين التاريخ والحاضر، ومن عبق التاريخ نرسم الحاضر والمستقبل.
ام احمد، لو ولدنا قبل خمسين او ستين عام قد أكون انا ام احمد او انتِ أم أحمد،، هي امرأة تمثل المرأة الفلسطينية دون النظر للاعوام التي عاشتها هذه المرأة ولكن بالنظر للمعاناة والسعادة التي مرت بها هذه المرأة.

بانتظار ورودك دوما هنا التي تنثرها اناملك حينما تخط في صفحتي

كل محبتي

اختك

همسة

10-25-2005, 11:24 PM

بسم الله الرحمن الرحيم

بعدها بنص ساعة أجى أبو احمد وعيونو مليانة دموع وكالي
- استعوضي الله في أحمد يا ام احمد..
- مات.
- كولي استشهد.
- مين كالك أنه ابني استشهد؟ سألته وأنا برجف.. ابني استشهد؟؟
ساعتها حسيت أنه الدنيا سودا، بطلت اشوف اشي غير صورة أحمد، روح كلبي يما يا احمد
لسة ما فرحت بالبدلة الميري، وانا يلي كنت بدي اخطبلك.. وكنت احلم اني اشوف اولادك
والاعبهم،، يما يا احمد ليش كل هالجفا يما،،، والله بدري عليك يما.
- احتسبيه عند الله شهيد يا ام احمد.
- يا رب اتكبلو من الشهدا.. ايش اكول
ايش اكول
صرخت صرخت وصرت اتزكر شو كان يوصيني ويكولي زغرتي يما
مرة ازغرت ومرة اصرخ.. يا ناس الظنا غالي، والكلب مش سهل ينسى حبيبو واحمد حبيبي واول فرحتي بدنيتي
- انت شفتو؟
- لأ ما شفتو، ولا حدا بيكدر يشوفو
- كيف مات؟ بس كولي.
- اليهود ما بنعرف ظربو عليهم اشي بالمعسكر تبعهم بالمنطار، ما ظل حدا عايش من كل الظباط الي معو..
- احمد يما وصرت ابكي وابكي.. والبكا ما بيرجع حبيب راح، وما صحيت على حالي غير بعد وكت ما بعرف كتير ولا كليل، بس كنت ادعي ربي أنه يطلع موت أحمد حلم.. اصحى من نومي.. ومن كابوسي.. اسألهم رجع احمد؟؟
يجاوبوني - لا حول ولا كوة الا بالله، المرة عكلها راح يشت.
- عكلي ما بيشت، رجعولي أحمد..
- يلي بيروح عند ربو ما بيرجع، الروح هادي امانة، وربنا أخد امانتو.
- يما يا احمد، يلي كنت نفسك تشوف كريتنا، يما متت كبل لتشوف اشي منها..
يا ناس كولولي ايش اعمل؟؟ ابني راح،، راح ابني... هيك شربة مي..
ولما اشوف ابوه اسأله..
- وكتيش بدكو تجيبوه اشوفو واودعو كبل لتدفنوه... نفسي ابوس ابني يا ناس؟
- ما حدا بيكدر يخش المعسكر تبعهم يا مرة عشان بيكولو انه لو كانو راشين عليهم كيماوي ممكن يموت الي بدو يروح هناك. راح نستنى شوي
- ايش ويضل ابني مرمي بالشارع، يمكن يجي اشي وياكلو... ما بتحمل الدودة تكرب من ابني.. يا حسرة كلبي عليك يا احمد.. ابني يا ناس ابني
- اصبري يا ام احمد اصبري، الصبر مفتاح الفرج.. والصبر بيهوّن المصايب.
- كلو الا أحمد يا ابو احمد..
ومر اليوم الأول
وما جابو احمد
ومر اليوم الثاني
وما جابو احمد
ومر اليوم الثالث، وسكرو العزا، وبطلت الناس تعزيني..
وبردو ما جابو احمد..
حظنت كميص أحمد،، وكتبه.. وصرت ابوسهم،، وأكول
- لسة ريحتك بالدار يما، لسة ريحتك بكميصك يما.. يما بتظل الريحة وانت بتروح..
- اصبري يا ام احمد، اصبري.. استعيني بالله.. يكولي ابو احمد.
- والنعم بالله.. بس يا ناس والله ابني.. ومهجة كلبي وأول فرحتي.. بيكفي أنه انولد بالكرية..

صمود

10-30-2005, 07:04 PM

همسة
رائع قلمك وهو يصور ماساة امهاتنا اللواتي يفقد فلذات اكبادهم ولم اتمالك نفسي من البكاء لانني تصورت نفسي مكان ام احمد
نحن بانتظار ابداعك همستنا الغالية الذي اضفى على منتدانا نكهة فلسطينية من عبق الماضي

همسة

10-30-2005, 09:46 PM

بسم الله الرحمن الرحيم
اختي صمود
لا تعتقدي للحظة واحدة أن الألم هنا من مخيلاتي.. الخصبة..
فليس لديّ مخيلة.. بواقع ما لديّ أذن استمع بها.. هذه القصص وأخرى سمعت سردها من عجائزنا الطيّبات.. واسعدني دوما رغم الألم ما يقصصنه.. فهو الذي يخصّب مخيلتي.
قد أكون دمجت بين مجموعة قصص ولكن لن تستغربي أن تكون اقسى واصعب من هذه الظروف قد مرت بها أي زوجة أو أم فلسطينية!! وما هو آت أصعب صدقيني.

كل محبتي لورداتك التي تركتيها وأدعو الله ألا تسقط دموعك الغالية إلا في لحظات الفرح. فقد ملّ شعبي الدموع.

كل محبتي

أختك

همسة

11-01-2005, 09:25 PM

بسم الله الرحمن الرحيم

وما كدرت أتحمل إنه ابني يظل مرمي بالشمس أكثر من هيك

ما لكيت سيارة توصلني لغزة، كالولي أنه المنطكة تبعت المنطار كريبة كتير من المناطك الي فيها الدبابات اليهودية.. بس انا ما خفت

اخذت أول سيارة وركبت لغاية ارض كليبو

ومن ارظ كليبو مشيت لحد السلك وصرت امشي على طول السلك

كالولي انه اعلى منطكة بالسجاعية هي المنطار

اطلعت من بعيد شفتها والله كتير بعيدة لكن الظنا غالي يا جماعة الخير غالي

كانت ساعتها الساعة تسعة الصبح

وهناك سألت واحدة بدوية وكلت الها وين المنطار يختي

ردّت علي وهي بترعى الغنم وخايفة من الطيارات امشي من هني وتصلي لهناك بس بدك وكت

وكت وكت معلش المهم اصل لابني

وبعد حوالي ساعة ونص وصلت لمنطكة المنطار ويا حسرة كلبي على اللي شفتو

يا حسرة كلبك يا صفية

شباب متل الورد مرمية عالارظ
شباب متل الفرسان الي رماهم الحصان وتركهم
كلهم جتت
طول
عرظ
شوارب
عشرات عشرات
هاظا ابن جيرانا خالد
وهاظا ابن كريتنا محمود
وهاظا صاحب ابني في المدرسة
وهاظا ابن المعلم الي كان في الكرية
يا ويلي يا ويلي
وما كانت الدودة ماكلة جسمهم
ولما شفت ابني
يا ناس
حرام والله
حرام يا ناس
ابني
كانت ابتسامته على وجهو متل متعودت عليها
رميت حالي فوق وجهو
وصرت ابوسو
واناديه
يما يا احمد
يا نور عين امك
يا حسرة كلبي عليك يما
يا حسرة كلبي عليك يما
بدي اخذو ادفنو يا ناس
ظميتو لصدري
وصرت ابكي
وغرّكت دموعي بذلته العسكرية
يما يا احمد كيف ادفنك يما
وهالشباب مين الهم غير ربنا
وسمعت صوت الطيارة جاية
نادى علي ختيار وكالي اتخبي يا حرمة لو شافو اشي راح يطخو هنا اتخبي بكول
ما تخبيت
ما بدي اعيش ولا دكيكة بعد ابني
سحبني الختيار وكالي اصبري يا حرمة احتسبيه عند الله شهيد هلكيت هو مبسوط انه لاكى ربه وعرف مكانه بالجنة ادعيلو عشان يتشفع الك وتلحكيه بالجنة
كلامو صبرني بس يا ناس الظنا غالي والله الظنا غالي
ولما راحت الطيارة فتشت عن سيارة عشان انكل ابني وادفنو ما بخلي ابني مرمي دكيكة واحدة
العجوز كالي ما بتلاكي هنا سيارات
- والحل يا عمي الحاج؟
- لو بقدر يا بنتي كان ساعدتك وحملتو انا واياكي.
- بدي ادفن ابني انا بدي ادفنو.
- روحي عند هظاك المصنع بتلاكي رجال شوفي يمكن يساعدوكي
رحت على المصنع ودكيت الباب
- مش بكفي الميتين كدامنا ايش بتعملي هنا يا مرة.
- بدي حدا يساعدني عشان اخد ابني وادفنو.
- ما بحمل انا اشي، ولو شغلت السيارة الطيارة بترمي علينا رصاص او برميل.
- وانا كيف ادفن ابني؟
- هادا مش شغلي. اسمعي اشتري مني زنكية وحطيه عليها.
- بكم؟
- بتلت ليرات.
- ما معي غير هالعكد.
- هاتيه.
واخذ العكد ولو طلب عمري راح اعطيه بس ما بخلي ابني مرمي هنا.
وجبت الزنكية وحطيت ابني فوكها، كان لحمو كتير طري لما المسو ينزل ويهش. صارلو ثلث ايام بالشمس يا ويلي هو وهالشباب ربي يعين اهلو
وحطيت الزنكية على راسي وحملتو
ومشيت المسافة الي مشيتها بالاول تكريبا 4 ساعات بس هالمرة وانا حاملة ابني فوك راسي شهيد...
يا ناس الظنا غالي.. وما في اصعب انه ظناك يكون ميت وما تدفنو..

همسة

11-09-2005, 06:21 PM

بسم الله الرحمن الرحيم

وترجل ابني الفارس احمد وحملوه الشباب على نعش الشهداء

ما ضل طفل الا وحكى عن احمد

ما ضل ختيار الا كص كصة احمد

احمد يلي امه حملتو فوك راسها 4 ساعات

احمد،،،

حملتو يا ناس تسع شهور

ما بدي احملو 4 ساعات

وبعدها غبت عن الوعي

ما صحيت غير بعد ايام وايام

والناس لسة بتكول

الله يعينها هالمسكينة

فكدت عكلها على ابنها

من كتر المحبة والحنان

ابنها خلص راح من كدام عينيها

وراح احمد.. والله يعوضني خير عنه

راجعة

wardo

11-09-2005, 11:33 PM

الله اكبر كم من طفل تيتم وكم من زوجه ترملت وكم من ام فقدت فلذت كبدها وكم وكم.....

رحم الله جميع شهدائنا واللهم اشفي جرحانا شفائا عاجلاً لا يتبعه سقما اللهم امين

بوركتي اينما كنتي خيتي همسه

همسة

11-11-2005, 12:15 AM

بسم الله الرحمن الرحيم

wardo

زيارتك جميلة.. كجمال روح ام احمد، التي حملت ولدها على راسها لمدة 4 ساعات متواصلات!! يا الله يا الله اين نحن من ام احمد وامثالها؟؟

اهلا وسهلا بك.. مرورك جميل..

كل المحبة

اختك

همسة

11-16-2005, 06:12 PM

بسم الله الرحمن الرحيم

ومضت الايام ومضت السنين

وعشت مكسورة الخاطرة حزينة على ابني احمد

اللي مهجة عيني وفؤادي ما فرحت عليه

وبعد هيك احتلتنا اسرائيل واخذت كل كطاع غزة وظمتو لالها

وظمت الظفة كمان

صارت فلسطين كلها مع اليهود

ومشيت الايام وسارت الليالي

واحنا بهمنا وبحزنا..

وصورة احمد ابني ما بتفارك خيالي

ترى لو ظل عايش كان ايش صار هلكيت..

ما بكي معي من درة عيوني غير محمد ونور

والله اطعمني من بعدهم إبراهيم على اسم عمي الله يرحمو

وصلنا هلكيت لسنة السبعة وثمانين

وكان عمر محمد الله يبارك في عمره 24 سنة

سافر على مصر مع اني ما رظيت اخليه يسافر على مصر

بس ايش اعمل يا جدة غصب عني.

وعمر نور هلكيت 20 سنة

خشت تدرس بالجامعة وتصير معلمة بالمدرسة.

وانا وابو احمد متل شجرة وظلها،، نطلع من الصبح عالحكلة

ونرجع المغرب

محمد كان يعلم اخته نور ايام المدرسة وكان داير بالو عليها

وهي كانت بنت جدعة شخصيتها كوية.

اما ابراهيم يلي هلكيت عمرو تكريا 12 سنة كان مدلع كتير.

وكان كل شي بدو لازم يصير.

كررنا نجوز محمد ولازم نفتش اله هلكيت عن عروس!!!

برجع عشان اكمل الكم.

همسة

11-27-2005, 08:02 PM

بسم الله الرحمن الرحيم

كررنا نزوج محمد ( اللهم صل على سيدنا محمد )

محمد شاب ومتعلم وفهمان وبدو بنت مكدرة وبنت ناس اصايل.

كنت بعرف بهديك المنطكة من كريتنا بنت غزالة لسة على اخر طريك المدرسة الثانوية.

رحت انا ومرت الجيران وشفنا هالبنت

والله البنت متلكم يا هالأصايل، بنت مأصلة وبنت أصول.

مش عاملة بحالها تكاليع.

البنت كانت تكريبا خام.

كلت الها تعالي يا خالتي اكعدي جمبي.

اجت وكعدت.

كلت الها ايش اسمك يا مزيونة.

كالت اسمي ( فاطمة )

كلت ستنا وتاج راسنا.

سالتها ( بتعرفي تطبخي ؟ )

ردت علي بكل ادب ويا دوبك الكلمة بتطلع من ثمها ( بعرف بس اكيد مش كدك يا خالتي ! )

شرحت كلبي الله يشرح كلبها للجنة كديش انبسطت على كلمة ( يا خالتي ) وكانت هي اول مخلوكة تكولي يا خالتي ومن يومها وانا خالتكو ام احمد ها يا صبايا.. سامعين؟؟

كلت الها يا خالتي يا فاطمة لو تجوزتي بدك تبطلي من المدرسة؟

كالت والله على كيفو اذا كان عايزني بروح عالمدرسة مش عايزني ما بروح.

كلت الها الله يسعدك والله هو عايزك تكملي توجيهي عشان تعرفي تعلمي الاولاد من بعد هيك.

كالت الي الله يهنيكو.

وراحت فاطمة والله البنت مزيونة كمان بالمشي، كانت بتمشي عدل، وراسها مطوملة وخدودها حمرا من الخجل.

شعرها كان طويل وعيونها سودا وواسعة.

رحت وكلت لـ ( محمد ) البنت مزيونة يما، وبدنا نعمل زي الاصول نروح ونشوف البنت وهم بدهم يسألو عنا.

كالي محمد الله يرضى عليه يا رب ( اللي بتشوفيه يما ).

بكمل الكم بعدين.

ام احمد

همسة

12-10-2005, 05:11 PM

بسم الله الرحمن الرحيم

يما يا محمد زبط حالك، وحط من العطر الغالي الي بيجيبو عمك صالح بالدكان، يختي كان بريحة الياسمين وهو في احلى من الياسمين للعرسان.

حلك دكنو وزبط شعراتو ناعمات كانو ينزلن على عيونو وكلت له ( الله يرظى عليك يما ، والله أحلى العرايس تختارك )، كالي بكل أدب ( تربايتك يا ست الحبايب ) وكرّب على ايدي وباسها ما كدرت امسك حالي من الدموع.. تزكرت احمد كان نفسي طول عمري اجوز الاثنين بيوم واحد. بس هادا كدر ربنا والمكدر ما في منو مهروب.

شفت ابو احمد، ولبستو الكمباز تبعو ( ابو احمد ما بطل يلبس كمباز طول هالسنين ) والحطة والعكال كانت على راسو بتبرك برك.. كان بيحبهن كثير وانا كمان، وعطرتو هو كمان، وكالي ( احنا راحت علينا يا ام احمد ) كلت له والله يا ابو احمد لو يصيرو اولاد اولادك رجال ويتجوزو بتظل في نظري اكثر منهم شباب، اي هو في واحد بكوتك وبشخصيتك وبحكمتك.. رد محمد ( هو هو احنا هنا كل هادا غزل يما؟ ) كلت له وان ما غزلت حبيبي ونور عيني مين اغزل يكود اروح افتش عن حدا تاني اتغزل فيه.

رد ابو احمد ( بكطم رجليكي لو تصيري عاملاها )
- هو انت شايفني يعني كايمة اعملها؟ بعدين مين بيطلع لمرة عجوزة زيي؟
- انتي عجوزة يا ام احمد انتي ست الصبايا. والله غزلو يا جماعة الخير خجلني بس هو كان كلبو كبير، وكان حنون كثير كثير، رغم انه كان عكلو صعب احياناً.
باركنا للعريس واتهنينا فيه وانا لبست فستان ازرك مطرز كله بيخوط احمر واخضر، كان على راسي بينطك نطك. واخذنا كيس للحلويات ورحنا لبيت العروس يا ناس عيب احنا نروح عالناس فاظيين من أولها.
خشينا وكعد محمد وهو مستحي ووجهو احمر
- والله يا ام احمد لما سألنا عنكو كل الناس مدحت فيكي وفي كلمة الحك الي على لسانك، وما ذكروا اخونا ابو احمد الا بالصابر ابو الشهيد.
- الله يرحمو احمد ابني ولا فيه زيو، كان مثل النسمة ومثل الجبل، النسمة بحنانه وبلطفو وركة كلامو، وجبل بكوة شخصيته ما كان حدا بيكدر يغلبو بالمصارعة الله يرحمو ويرظى عليه امنت بالله اني رظيت عنه والله يجعلني من اللي راح يشفع الهم.
- اللهم امين.
انبسط ابو احمد على اخلاك هالناس وعلى حسن استكبالهم، ووافكنا نعطيهم مهر 1000 دينار اردني رغم انه كثير، بس الناس اصايل ومزيونين، ما في شي بيعايبهم عن اصولكم يا اولاد الاصول.
وصار العرس، وفزعو الشباب، وحط محمد صورة اخوه احمد فوك راسه، عشان يحس انه روح احمد معنا، بتمشي معنا وبتروح معنا وبتفرح لفرحنا، بس ما بكزب عليكم كل ما اشوف صورتو اطلع فيه وبدي ابكي، روح كلبي احمد مهجتي والله حسرة موتو بكلبي لاخر العمر، بس هو ابني محمد وما بكدر يا ناس اني ازعلو يوم فرحة عمرو.
وهيك صار عندي كنة عكبال عندكن كلكن تكنن.
برجع اكمل الكم.